ხელვაჩაურში ხანძრის შედეგად დაშავებული მამაკაცის მდგომარეობა მძიმეა
პაციენტს სხეულის 50% აქვს დამწვარი.
ხელვაჩაურში ხანძრის შედეგად დაშავებული 31 წლის მამაკაცის მდგომარეობა მძიმეა. ხეჩინაშვილის კლინიკის დამწვრობის ცენტრის ექიმის გიორგი დავლიანიძის თქმით, პაციენტს სხეულის 50% აქვს დამწვარი.
„პაციენტი ბათუმიდან სასწრაფო გადაუდებელმა დახმარებამ გადმოიყვანა და ამჟამად მკურნალობას რეანიმაციის განყოფილებაში გადის. მისი მდგომარეობა მძიმეა. მამაკაცს სხეულის 50% აქვს დამწვარი. იგი დამწვრობითი შოკის მდგომარეობაში იმყოფება.მას სპეციფიური ანტიშოკური თერაპია უტარდება“,-განაცხადა გიორგი დავლიანიძემ.
ხელვაჩაურის მუნიციპალიტეტის სოფელ შარაბიძეებში ხანძრის შედეგად ცოლ-ქმარი დაიღუპა, ხოლო მათი შვილი 31 წლის მამაკაცი მძიმედ დაშავდა.
წყარო:newposts.ge
