თეგებით ძიება
28. 11. 2020 სპორტი

საქართველოს კალათბურთელთა ეროვნულმა ნაკრებმა ევრობასკეტ 2022-ის შესარჩევ ეტაპზე სტუმრად ფინეთი 85:91 დაამარცხა

საქართველოს კალათბურთელთა ნაკრებმა ქალაქ ესპოოს METRO არენაზე ევრობასკეტ2022-ის შესარჩევი ეტაპის მესამე ტურში ფინეთი 91:85 დაამარცხა.

კორონავირუსის გამო ტურნირის ფორმატი შეიცვალა და ე.წ. ბაბლის სისტემით გრძელდება. ჩვენს გუნდს ამ შეხვედრაში გოგა ბითაძე, დუდა სანაძე, ბექა ბურჯანაძე, სანდრო მამუკელაშვილი , მიხეილ ბერიშვილი და რატი ანდრონიკაშვილი ვერ დაეხმარენ, ხოლო მასპინძლებს სამი წამყვანი მოთამაშე დააკლდათ.

საქართველოს ნაკრებმა თამაში შემდეგი სასტარტო ხუთეულით დაიწყო: შენგელია, მაკფადენი, შერმადინი, ბოქოლიშვილი, კორსანტია. ზუროსის მიერ ორი ცენტრის დაყენება ფარზე უპირატესობის მოპოვებით იყო განპირობებული. დებიუტში მასპინძლები 4 ქულით დაწინაურდნენ, თუმცა შერმადინის,
შენგელიასა და მაკფადენის მეცადინეობით ჩვენმა გუნდმა უპირატესობა მოიპოვა და წინ გაიჭრა. თანაც, „სუომი“ ჯარიმებით დაიტვირთა და პირველი მეოთხედი 22:19 მოვიგეთ.

მეორე მეოთხედის დასაწყისში საქართველოს ნაკრები 10 ქულით გაიქცა, შემდეგ მოწინააღმდეგემ ანგარიშის შემცირება მოახერხა და პირველი ტაიმი 40:44 დასრულდა.

ზუროსის შეგირდებმა მესამე პერიოდი ცუდად დაიწყეს, 5 გუნდური პერსონალური მიიღეს, შენგელია და მაკფადენიც ვერ ირჯებოდნენ ჩვეულად, ბოლოს ბაქრაძემ მეტოქეს ბურთი მოპარა და დასკვნითი მეოთხედის წინ ფრე - 65:65. აღსანიშნავია დებიუტანტების - ფევაძისა და ბაქრაძის კარგი თამაში.

მეოთხე მეოთხედში საქართველოს ნაკრები თავიდან მდევრის როლში იყო, შერმადინთან ბრძოლაში მისმა ორმა მეურვემ მიიღო მეხუთე ფოლი, ბოლოსკენ ჩვენი გუნდი მეტოქეზე უკეთ თამაშობდა და მორიგი გამარჯვება მოიპოვა.

ჩვენი გუნდიდან 27 ქულა შერმადინმა ჩააგდო (პლუს 10 მოხსნა), 19 შენგელიამ (8 მოხსნა), 14 მაკფადენმა, 11 ფევაძემ (6 მოხსნა), 10 ბაქრაძემ, სტუმართაგან კი 22 ქულით საუკეთესო სალინი იყო.

30 ნოემბერს საქართველოს ნაკრები შვეიცარიას დაუპირისპირდება, რომელმაც სენსაციურად სერბეთს სძლია.


თეგები


მსგავსი სიახლეები

რეკომენდირებულია თქვენთვის

ყველა

აღმოაჩინეთ მეტი Tia-დან

ყველა