არავის დავაჩაგვრინებთ… ვისაც ლოცვა მოგინდებათ, შეგიძლიათ ჩემთან მოხვიდეთ – პატრიარქი მუსლიმებზე
ჩოხატაურის რაიონის სოფელ ბუკნარში განვითარებული მოვლენების ფონზე სოციალურ ქსელში საქართველოს პატრიარქის 2013 წლის სიტყვები გაიხსენეს, რითაც ილია მეორე მაშინ მსგავსი ტიპის დაპირისპირებას (სამთაწყაროში) გამოეხმაურა და მისი ბავშვობის მოგონება გაიხსენა.
აი, რა თქვა კათოლიკოს პატრიარქმა 2013 წელს, როდესაც სამთაწყაროში მცხოვრები მუსლიმი მოსახლეობისა და მართლმადიდებელი ქრისტიანების ნაწილს ერთად შეხვდა:
„მე დავიბადე ყაზბეგში და ძალიან ხშირი სტუმრობა იყო ჩემთან მუსლიმანი ქისტების. ჩვენთან რომ ჩამოდიოდნენ, ჩვენს სიხარულს საზღვარი არ ჰქონდა. დედა და ბებია ყველაზე კარგ ოთახში აგებდნენ ხალიჩებს, რომ იმათ თავისთვის ელოცათ. ჩვენ ხატების წინ ვლოცულობდით, შემდეგ კი ერთად ვსხდებოდით და ვჭამდით საჭმელს”, – განაცხადა უწმინდესმა.
პატრიარქის თქმით, ღმერთი არის ერთი და ამიტომ მუსლიმები და ქართველები ერთმანეთს უნდა დაეხმარონ. “ჩვენთვის ერთიც და მეორეც შვილები ხართ და არავის დავაჩაგვრინებთ. ვისაც ლოცვა მოგინდებათ, შეგიძლიათ ჩემთან მოხვიდეთ. თქვენ ერთმანეთს უნდა დაეხმაროთ. მინდა გითხრათ, რომ დიდი სურვილი მაქვს ჩამოვიდე თქვენს სოფელში და პირადად მოვინახულო სამთაწყარო. ხელოვნურ პროვოკატორებს არ უნდა მოუსმინოთ. ღვთის მადლით, მშვიდად უნდა ვიყოთ და ღმერთი ვადიდოთ”, – აღნიშნა პატრიარქმა.
"პრაიმტაიმი"
