"ჩასვლისას ფეხი ჩაცურებია, ძმაც აღარ იყოო, როგორც ჩანს, საშველად გადახტა" - რას ჰყვებიან უჯარმაში გარდაცვლილ ძმებზე?
უჯარმაში, მდინარე იორის არხში, მაშველებმა გვიან ღამით 16 და 21 წლის ძმების ცხედრები იპოვეს.
გარდაცვლილები ძმები ნიკა და ივიკო მახარობლიშვილები არიან.
ადგილობრივების ინფორმაციით, ბიჭები საბანაოდ მამიდაშვილთან ერთად იყვნენ წასულები.
"აქ ჩამოსულები არიან, დედის სოფელში, მამაც კახეთიდან არის, წარმოშობით. ეგ ადგილი ხავსიანია და ორი მეტრი აქვს სიმაღლე ამ არხს. 16 წლის ბიჭი ფეხით ჩასულა, ჩასვლისას ფეხი ჩაცურებია, ძმა და მამიდაშვილი ზემოთ ყოფილან და მამიდაშვილი ამბობს, რომ მოვიხედე, ძმაც აღარ იყოო. როგორც ჩანს, საშველად გადახტა“,- ამბობს ერთ-ერთი ადგილობრივი.
