"ჩემგან 10 ნაბიჯში ვიღაც სიკვდილს ებრძვის, ვიღაც კივის, მეშინია - კოვიდინფიცირებული პაციენტის წერილი კლინიკიდან
კოვიდინფიცირებული ეკატერინე მიქელაძე, რომელიც covid19-ის დიაგნოზით მკურნალობს, კლინიკაში არსებულ მდგომარეობაზე სოციალურ ქსელში სტატუსს აქვეყნებს.
“დღე მეთორმეტე.
უმძიმესი პაციენტი მოიყვანა სასწრაფომ, ადგილი არ არის და ვერ ღებულობენ. საშინელი ამბავია გარეთ, პაციენტის პატრონი ანგრევს ყველაფერს, კლინიკის ექიმები გიჟებივით დარბიან, გაუტანეს ჟანგბადი და სასწრაფოს მანქანაში ასუნთქებენ. ძალიან მძიმე მოსასმენია სასოწარკვეთილი ადამიანების მუდარა, დერეფანში მაინც შეიყვანეთ და გადამირჩინეთო .
ხან მგონია, რომ სიზმარში ვარ. პირველი ეტაპის ინფიცირებულები 5ვარსკვლავიან სასტუმროებში დაარიგეს და მეორე ეტაპის პაციენტებს საავადმყოფოებში ვერ აწვენენ საშინლად მძიმე დღეშია მედპერსონალი, ძალიან მეცოდებიან.
ვწვები და ბალიშს ვიფარებ სახეზე, მსუბუქი პნევმონია მაქვს და სტაბილური ვარ. გაიდლაინით ჯერ არ მეკუთვნის კლინიკის დატოვება. ჩემგან 10 ნაბიჯში, სასწრაფოს მანქანაში, ვიღაც სიკვდილს ებრძვის და ვიღაც გაბმულად კივის. სრულ კოშმარში ვარ და თან მრცხვენია, თან მეშინია”,-წერს ეკატერინე მიქელაძე ფეისბუქში.
