ანაფილაქსიური შოკი ლიდოკაინზე და ნოვოკაინზეც კი ვითარდება - ბიძინა კულუმბეგოვი
ალერგოლოგ-იმუნოლოგის, ბიძინა კულუმბეგოვის განცხადებით, ანაფილაქსიური რეაქცია, რომელიც, სავარაუდოდ, ახალციხის "იმედის კლინიკაში" 27 წლის ექთანს ვაქცინაციის შემდგომ განუვითარდა, შესაძლოა ლიდოკაინის, ნოვოკაინის ან ანტიბიოტიკის მოხმარებასაც მოჰყვეს.
მისი თქმით, ეს არის გავრცელებული რეაქცია, მაგრამ, ამის მიუხედავად, მედიცინა ამ მედიკამენტების გამოყენებაზე უარს ვერ იტყვის.
"ეს არის ცნობილი რეაქციები, რომლისგანაც არავინაა დაზღვეული. საქართველოში რამდენიმე ათეული რეაქცია ანაფილაქსიის, იგივე ლიდოკაინზე და ნოვოკაინზე, სრულიად მარტივ წამლებზეც კი ვითარდება, აღარ ვამბობ ანტიბიოტიკებზე. შესაბამისად, ამ წამლების გამოყენებაზე მედიცინა უარს ვერ იტყვის,"-აცხადებს ბიძინა კულუმბეგოვი.
