"ეგონა, რომ გათხოვდა, მაგრამ ქალიშვილი არ ხარო და პირველივე ღამეს ქმარმა გამოაგდო… დედის თხოვნით საქორწინო კაბით დაკრძალეს!.."
მამა პეტრე კოლხი (კვარაცხელია) სოციალურ ქსელში პოსტს აქვეყნებს:
"ოცდათხუთმეტ წლამდე იქნებოდა. ეგონა, რომ გათხოვდა, მაგრამ ქალიშვილი არ ხარო და პირველივე ღამეს ქმარმა სახლიდან გამოაგდო… ევედრებოდა, ასე ნუ მომექცევი, ჩემებს გული გაუსკდებათ, ვერ გადაიტანენ, ერთი კვირა შემიფარე, თუ ასე ვერ მიტან და მერე ჩემს გზას ვეწევიო…
კაცმა ქვა ააგდო თავი შეუშვირა, ასე ვერ მოვიქცევი, ადექი და სადაც გინდა იქ გადაეთრიეო…
ქალის ოჯახში კი უკვე მილოცვებს იღებდნენ, უხაროდათ, ძლივს ბედს ეწია, მთავარია ბედნიერი იყოს და გამრავლდესო…
მეორე დღეს სამწუხარო ამბავი შეატყობინეს, ქმარს ქალიშვილი არ ჩაბარდა, გააგდეს და არავინ იცის სად წავიდაო…
ნათესავებმა, ეს ჩვენს თავზე ლაფის დასხმაა, მაგას როგორ ვაპატიებთ, არასდროს გამოჩნდეს, ჯანდაბამდე წასულაო…
სხვა ქალაქში დასახლდა, ყველასგან მიტოვებული და უარყოფილი…. დედას ისე მოენატრებოდა, ქმრის საფლავზე გადიოდა და მოთქმას იწყებდა… სახლში მისი სახელის ხსენებაც, ტირილიც და საუბარიც ეკრძალებოდა…
წლების მერე დედას წერილი გამოუგზავნა, ცოცხალი ვარ, კარგად ვარ, თავს მიხედე, გულს ნუ გაიხეთქავო…
ჰო, ცოცხალი იყო, მაგრამ ოჯახის წევრების მონატრებას ვერ უძლებდა, ზოგჯერ მეზობლებთან დარეკავდა, ერთსა და იმავე ისტორიას ათასჯერ მოაყოლებდა… თუ მეზობლები მოახერხებდნენ და დედამისს სახლიდან გამოაპარებდნენ, მთელ სახლს ზლუქუნი და ცოცხლად დატირება ფარავდა…
წლები ასე, სამუდამო მისჯილ პატიმარს გავდა…
თავიდანვე ითქვა, მშობლიურ ქალაქს ვერ იხილავსო და მორჩა…
აგვისტოს დასაწყისი იდგა, ამბავი შეგვატყობინეს, სამი დღე სამსახურში არ გამოჩენილა, ბოლოს თანამშრომლებმა კარი შეამტვრიეს და ლოგინში მკვდარი იპოვნესო…
ექსპერტიზამ დაასკვნა, რომ გული გაუსკდა…
მთელი რაიონი გლოვობდა… მიცვალებული ბავშვობის სახლში დააბრუნეს…
დედის თხოვნით საქორწინო კაბით დაკრძალეს!..".
