ველოდებოდი, მკაფიო განმარტებას და უარყოფას იმისა, რომ ჩარევა არ მომხდარა - კობახიძე სასამართლოს სკანდალზე
ჩვენთვის საინტერესოა მივიღოთ მკაფიო პასუხი იმასთან დაკავშირებით, თუ რა მოხდა, განხორციელდა თუ არა ზეწოლა ან ასეთი უხეში ფორმით, როგორზეც საუბრობს მოსამართლე ჩხიკვაძე - ამის შესახებ "ქართული ოცნების" თავმჯდომარემ, ირაკლი კობახიძემ ჟურნალისტებთან განაცხადა.
"სასამართლო რომ თავს იცავს ზეწოლისგან, ეს არის ჩვეულებრივი მოვლენა, ამას ობიექტურად ვერავინ ვერ დაარქმევს კამპანიას ვინმეს წინააღმდეგ. თუ სასამართლოზე ხორციელდება ზეწოლა და სასამართლო ამისგან თავს იცავს, ეს არის აბსოლუტურად ჯანსაღი მოვლენა. სასამართლო არის ერთ-ერთი ინსტიტუტი, ამ ინსტიტუტს წარმოადგენენ მოსამართლეები და შესაბამისად, ისინი როდესაც თავს იცავენ, ეს არის, რა თქმა უნდა, ჩვეულებრივი ლოგიკური გაგრძელება.
რაც შეეხება, სასამართლოსთან დაკავშირებულ საკითხს. მე ველოდებოდი, მკაფიო განმარტებას და უარყოფას იმისა, რომ ჩარევა არ მომხდარა. ჩვენ არაერთხელ გვითქვამს წარსულში, რომ როდესაც აგორებული იყო კამპანია ამ ზეწოლასთან დაკავშირებით, რომ ამერიკის საელჩოდან ამას არავინ არ იკადრებდა და შესაბამისად, სწორედ ასეთ პასუხს ველოდით, რა თქმა უნდა ამერიკის ელჩისგან, რომ ის დარწმუნებული იყო, რომ ამერიკის საელჩოში ეს არავის უკადრია. შესაბამისად, ვფიქრობდი, რომ ის უარყოფდა იმ ბრალდებას, რომელიც გაისმა მოსამართლე ჩხიკვაძის მხრიდან. თუმცა ეს არ მოვისმინეთ, რაც არის ძალიან დამაფიქრებელი და შემაშფოთებელი. კიდევ ერთხელ, რა თქმა უნდა, ჩვენთვის საინტერესოა მივიღოთ მკაფიო პასუხი იმასთან დაკავშირებით, თუ რა მოხდა, განხორციელდა თუ არა ზეწოლა ან ასეთი უხეში ფორმით, როგორზეც საუბრობს მოსამართლე ჩხიკვაძე. ან უნდა იყოს ეს ფაქტი უარყოფილი, მკაფიოდ და ცხადად ან უნდა ვიღაცამ აიღოს პასუხისმგებლობა იმაზე, რომ განხორციელდა კონკრეტული თანამშრომლის მხრიდან ზეწოლა ქართველ მოსამართლეზე," - განაცხადა ირაკლი კობახიძემ.
