ვტოვებ პარტიას "გახარია - საქართველოსთვის", არ მინდა ავიღო პასუხისმგებლობა იმ დაპირებების გამო, რომლებიც არის სრული სიცრუე - ერეკლე დოლიძე

გახარიას პარტიის რუსთავის ორგანიზაციის აწ უკვე ყოფილმა წევრმა, ერეკლე დოლიძემ ისაუბრა იმ გარემოებებსა და პარტიის მიერ გაცემულ დაპირებებზე, რის გამოც გადაწყვიტა, "გახარია - საქართველოსთვის" დაეტოვებინა. კერძოდ, დოლიძის თქმით, მიუღებელია, რომ პარტიის საპარლამენტო სიაში აღმოჩნდა ზვიად ძიძიგური, ასევე, გიორგი გახარიამ გასცა ცრუ დაპირება თბილისი-რუსთავის დამაკავშირებელი მეტროს შესახებ, ვინაიდან სწორედ მისი პრემიერ-მინისტრობის დროს შეჩერდა ამ ორ ქალაქს შორის დამაკავშირებელი ავტობანის მშენებლობა.

"საპარლამენტო სიაში აღმოჩნდა ზვიად ძიძიგური, ადამიანი, რომელიც ერთხელ უკვე იყო მივლინებული დეპუტატად და ვერ განახორციელა ქალაქისთვის ვერც ერთი სასარგებლო პროექტი. ასევე, რამდენიმე დღის წინ ჩამოსული იყო გიორგი გახარია, რომელმაც განაცხადა, რომ განახორციელებდა რუსთავი-თბილისის დამაკავშირებელი მეტროს პროექტს, ეს არის სრული სიცრუე, გამომდინარე იქიდან, რომ მისი პრემიერ-მინისტრობის დროს შეჩერდა რუსთავი-თბილისის დამაკავშირებელი ავტობანი. სწორედ ამ და სხვა დაპირებების გამო, რომლებიც არის სრული სიცრუე, არ მინდა ავიღო პასუხისმგებლობა ჩემი მეგობრებისა და მოქალაქეების წინაშე, მივიღე გადაწყვეტილება, დავტოვო პარტია "გახარია - საქართველოსთვის", - განაცხადა ერეკლე დოლიძემ.