სელენა ზოდიაქოს ნიშნებში - სელენა ტყუპებში

აქამდე არაერთი სტატია და განხილვა მიეძღვნა ფორუმზე შავი მთვარის იგივე ლილიტის განლაგებას და მის გავლენას ადამიანზე (უფრო კონკრეტულად ლილიტზე ინფორმაცია იხილეთ აქ http://forum.astrologi.ge/viewtopic.php?f=9&t=16) , თუმცა ამის პარალელურად, ვფიქრობ უპრიანი იქნება, თუ თეთრ მთვარეს იგივე სელენასაც დავუთმობთ ყურადღებას. მით უმეტეს, რომ ცოტა ხნის წინ სელენას განლაგებაც შეიცვალა და იგი სასწორის ზოდიაქოს ნიშნიდან, მორიელის ზოდიაქოში გადავიდა.

სელენა ნებისმიერი ჩვენგანის პირად კოსმოგრამაში ფიგურირებს, ლილიტთან ერთად. თუმცა თუ ლილიტი წარსული ინკარნაციებიდან გადმოყოლილ ფარულ საფრთხეებსა და მავნე ჩვევებზე მიგვანიშნებს, სელენა მის საპირისპიროდ მიუთითებს იმას, თუ რა სახის ნათელი კარმა დავაგროვეთ ჩვენ წარსულ ცხოვრებაში. სწორედ ეს დადებითი გამოცდილება გვეხმარება ამჟამინდელ ინკარნაციაში სელენას სფეროებში წინსვლა რომ შევძლოთ, ხოლო ხალხი ვინც ჩვენი სელენას ზოდიაქოს ნიშანს შეესაბამება, კეთილისმყოფლად გვევლინება ხშირად.

სელენას განლაგების შესახებ თითოეულ ზოდიაქოსა ნიშანსა და სახლში, ოდნავ მოგვიანებით შემოგთავაზებთ სტატიების ვრცელ ციკლს, ამჯერად კი მინდა მოკლედ მოგახსენოთ იმის შესახებ, თუ რას გვიქადის თეთრი მთვარის ტრანზიტული კომბინაცია მორიელის ზოდიაქოს ნიშანში, რომელიც უახლოესი ერთი წლის მანძილზე გასტანს.

სელენას განლაგება მორიელის ზოდიაქოში აძლიერებს ადამიანური ნაკლოვანებების, ფარული ზრახვებისა და ჩანაფიქრების ზედაპირზე ამოტივტივების და გაცხადების ტენდენციას. ხალხი, ვისაც პირად რუკაში წყლის სტიქიის პლანეტების სიმრავლე აღენიშნება, სელენას ამგვარი ტრანზიტისას განსაკუთრებით მძაფრად დაიწყებს გარშემო მყოფების ფარული აზრების აღქმა-გაშიფრვას. თუმცა სელენა მორიელში ბევრის ცხოვრებაში დააყენებს "განწმენდის გზაზე" დადგომის საკითხს. თუ ნებაყოფლობითად არა, იძულებით (გარემოებების მსვლელობის მეშვეობით) მაინც. ამიტომ ბევრი ადამიანისთვის მოიტანს სელენას ტრანზიტი მორიელში სულიერ ძვრებს, საკუთარ თავში ჩაღრმავების აუცილებლობას, თუნდაც ემოციური ტკივილის სახით. შესაბამისად, თუკი ტრანზიტული სელენა თქვენს პირად კოსმოგრამაში რომელიმე მთავარ პლანეტას "ჩაება" მის აქტივაციას გამოიწვევს სწორედ სულიერების კუთხით. ასე მაგალითად, ვენერას შემთხვევაში – იგი მოიტანს ახალ ნაცნობობას, რომელიც თქვენში ფასეულობების გადაფასებას ან ემოციურ ძვრებს შეუწყობს ხელს. მერკურის შემთხვევაში – აქამდე დაფარულ საიდუმლოებებს ახდით ფარდას, მარსის შემთხვევაში – შესაძლოა მოგიხდეთ პრინციპული ნაბიჯების გადადგმა სამართლიანობის დასაცავად და ა.შ.
ზოგადად სელენას ტრანზიტი მორიელში იძლევა უნიკალურ შანსს განვითარდეთ სულიერად. ამაღლდეთ თქვენს ნაკლოვანებებზე და გადახვიდეთ პიროვნული განვითარების გაცილებით უფრო მაღალ ეტაპზე. ეს არის სულიერი გამოღვიძების ხანა. რომლის დროსაც ლილიტის კირჩხიბში განლაგების პარალელურად (შეგახსენებთ, რომ ლილიტი ამგვარი ტრანზიტით ოჯახურ ფასეულობებს "უტევს") სელენა საშუალებას მოგცემთ, კიდევ ერთხელ გადააფასოთ და რაც მთავარია, დააფასოთ თქვენი დამოკიდებულება ოჯახის წევრების, ახლობლებისა და საყვარელი ადამიანების მიმართ.



სელენა ტყუპში

სელენას ეს მდებარეობა მიანიშნებს იმას, რომ ადამიანს განვლილი ინკარნაციიდან მოჰყვება ობიექტურობის, მიუკერძოებლობის კარმა. იგი შესაძლოა იყო მოსამართლე, მწერალი ან შუამავალი რაიმე სახის საქმეში, თუმცა ყოველთვის ღაღადებდა სიმართლეს. ამის გამო, იგი ამ ცხოვრებაში ჯილდოვდება იმით, რომ მას ყოველთვის უადვილდება ინფორმაციის მოპოვება, ამასთან ერთად, იგი ადვილად ახერხებს მიმდინარე მოვლენების ჭეშმარიტ არსში წვდომას. შემთხვევითი როდია რომ სელენას მსგავსი მდებარეობით ბევრი კარგი ჟურნალისტი და პუბლიცისტი იბადება. გარდა ამისა, სელენას ამგვარი მდებარეობა ადამიანს კარგი დედმამიშვილებითა და მეზობლებითაც აჯილდოებს. ის, ვისაც სელენა ტყუპის ზოდიაქოში აქვს, კარგი მოსწავლეა და ადვილად ითვისებს ენებს. მათთვის ადვილია ისეთ სფეროებში მოღვაწეობაც, რომელიც ინფორმაციის გაცვლა-გადაცემას ეხება (მაგ. რეკლამა, გამომცემლობა, პიარი). ბევრი სელენა ტყუპი გვხდება ასევე, ლექტორებსა და მასწავლებლებს შორის. სელენას ამ პოზიციის უმაღლესი გამოვლინება კი საყოველთაოდ აღიარებული მწერლის ან ფილოსოფოსის კარიერაა.
წყარო: astrologi.ambebi.ge