"ხელისუფლებამ გადაწყვიტა მთავარი ამოცანა - რიგგარეშე არჩევნების დანიშვნის მოთხოვნას საფუძველი გამოეცალა" - გია ხუხაშვილი

ანალიტიკოსი, გია ხუხაშვილი 2 ოქტომბერს საქართველოში ჩატარებული თვითმმართველობის შედეგებს სოციალურ ქსელში აანალიზებს:

"რამდენიმე მოსაზრება:
1. ხელისუფლებამ გადაწყვიტა მთავარი ამოცანა - მიშელის შეთანხმებით განსაზღვრულ 43%-იან დათქმას აქტუალობა დაუკარგა. შესაბამისად, რიგგარეშე არჩევნების დანიშვნის მოთხოვნას დასავლეთის მხარდაჭერით პირდაპირი საფუძველი გამოეცალა.

2. პოლიტიკურად მნიშვნელოვან ოლქებში, პირველ რიგში დიდ ქალაქებში, გაჩნდა უზურპირებული ძალაუფლების გარღვევის შანსი.

3. თბილისზე, როგორც პოლიტიკური ცხოვრების ცენტრზე, ხელისუფლებამ დაკარგა კონტროლი, რაც მინიმუმ იმის წინაპირობაა, რომ სრულად პროპორციულ არჩევნებს ხელისუფლება ცალსახად წააგებს.

4. სააკაშვილის “ტრიუკმა” სერიოზულად დააზიანა ოპოზიცია (არა ნაც.მოძრაობა), რომლის ჯამური შედეგი შესაძლოა 5-7%-ით მეტი ყოფილიყო. ეს მოხდა იმიტომ, რომ მის მიერ გამოცხადებულმა მობილიზაციამ ავტომატურად შექმნა მეორე პოლუსის მობილიზაციის საფუძველი, რომელიც ტრადიციულად უფრო დიდი აღმოჩნდა.", - წერს ხუხაშვილი.

2 ოქტომბრის თბითმმართველობის არჩევნების წინასწარი შედეგებით, საქართველოს თვითმმართველ ქალაქებში, მათ შორის თბილისში მეორე ტური გაიმართება. პროპორციულ ნაწილში კი მმართველმა გუნდმა, წინასწარი მონაცემებით 47.6% აიღო.