ხალხმა უნდა იცოდეს სიმართლე - სოზარ სუბარი განმარტებას აკეთებს
დღეს გარანტია, რომ საქართველო არ ჩაებას ომში, არის ხალხი და ხალხმა უნდა იცოდეს სიმართლე, - აცხადებს "ქართული ცონების" აწ უკვე ყოფილი წევრი,სოზარ სუბარი, რომელმაც პარტია ცოტა ხნის წინ დატოვა.
"ისტორიულ გზაგასაყარზე ვდგავართ და ხშირად ყოფილა საქართველოს წინაშე ისეთი პერიოდები, როდესაც ძალიან რთული პერიოდი გვედგა და რთული პერიოდი არის იმ მხრივ, რომ ყოველ წუთიერად არის საფრთხე, რომ საქართველო ჩაებას ომში და ამისი მსურველი ძალიან ბევრია, გაცილებით ბევრი, ვიდრე შეიძლება ვინმე დანილოვი, ან ვინმე არახამია იყოს.
მეორეს მხრივ - ვართ გზაგასაყარზე, როცა იხსნება კარი ევროკავშირში ჩვენი გაწევრიანებისთვის და ყველაფერი უნდა გავაკეთოთ, რომ ევროკავშირში რაც შეიძლება სწრაფად და უსაფრთხოდ გავწევრიანდეთ.
ევროკავშირიც განზე დარჩება და ყველაფერიც, თუ ომში ჩაბმას მოახერხებენ ის ადამიანები ვისაც ამისი სურვილი აქვთ და ამისი მოსურნე ძალიან ბევრი ვინმეა და ძალიან გავლენიანებიც, მათ შორის. სამყარო იცვლება, ერთხელ თოფი თუ გავარდება, შენ ვეღარ მართავ პროცესს, ის პროცესი თვითონ მიდის და ჩვენ იძულებული ვართ, ავყვეთ ამ თამაშის წესებს და ეს არ გვინდა, რომ მოხდეს.
დღეს გარანტია, რომ საქართველო არ ჩაებას ომში, არის ხალხი და ხალხმა უნდა იცოდეს სიმართლე, რომ შესაბამისად, მათი მტკიცე ნება იყოს ომის გაჩაღების წინააღმდეგ,"- განაცხადა სოზარ სუბარმა.
ცნობისთვის, ცოტა ხნის წინ გახდა ცნობილი, რომ სოზარ სუბარმა, დიმიტრი ხუნდაძემ და მიხეილ ყაველაშვილმა "ქართული ოცნება" და საპარლამენტო მანდატები დატოვეს.
