ღარიბაშვილი მადრიდში ბორის ჯონსონს შეხვდა
საქართველოს მთავრობის ინფორმაციით, ღარიბაშვილი გაერთიანებული სამეფოს პრემიერ-მინისტრს, ბორის ჯონსონს შეხვდა. ღარიბაშვილი მადრიდში იმყოფება, სადაც ნატოს სამიტი მიმდინარეობს. მთავრობის განცხადებით, შეხვედრის მთავარი განსახილველი საკითხები იყო სტრატეგიული პარტნიორობა და ორ ქვეყანას შორის მჭიდრო მეგობრული ურთიერთობები
"პრემიერ-მინისტრმა ირაკლი ღარიბაშვილმა გაერთიანებული სამეფოს პრემიერ-მინისტრს საქართველოს სუვერენიტეტის, ტერიტორიული მთლიანობისა და ევროატლანტიკური ინტეგრაციის გზაზე ურყევი მხარდაჭერისთვის მადლობა გადაუხადა და იმედი გამოთქვა, რომ პარტნიორობა კიდევ უფრო გაღრმავდება დემოკრატიზაციისა და რეფორმების კვალდაკვალ.
შეხვედრისას ყურადღება გამახვილდა ორ ქვეყანას შორის სხვადასხვა მიმართულებით არსებულ მჭიდრო თანამშრომლობაზე და აღინიშნა, რომ სტრატეგიული დიალოგის ფორმატმა და არაერთი მიმართულებით თანამშრომლობამ ორ ქვეყანას შორის არსებული ურთიერთობები ახალ ეტაპზე გადაიყვანა. ირაკლი ღარიბაშვილმა ბორის ჯონსონი მისთვის ხელსაყრელ დროს საქართველოში მიიწვია." აცხადებს მთავრობა.
