კახეთში კორონავირუსით 23-ე პაციენტი გარდაიცვალა

კახეთში, კორონავირუსის დიაგნოზით 23-ე პაციენტი გარდაიცვალა. კოვიდინფიცირებული კაცი მკურნალობის კურსს თელავის ცენტრალურ საავადმყოფოს ბოქსირებულ განყოფილებაში გადიოდა, თუმცა მძიმე თანმხლები დაავადებებისა და ჯანმრთელობის მდგომარეობის გაუარესების გამო, ექიმებმა მისი გადარჩენა ვეღარ შეძლეს.

Imedinews-ის ინფორმაციით, 72 წლის კოვიდპაციენტი ლაგოდეხის მუნიციპალიტეტიდან იყო.

ხანდაზმული კაცი კორონავირუსის დიაგნოზით საავადმყფოში რამდენიმე დღის წინ მოხვდა.

ამ დროისთვის საქართველოში კორონავირუსის 114 889 შემთხვევაა დადასტურებული. გამოჯანმრთელებულთა რაოდენობა 95 581-ს შეადგენს. გარდაიცვალა 1 085 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.