"შეხედე ამ ადამიანებს! "რა მიკვირს იცი, როგორ გძინავს ღამე?!"
პარლამენტის ყოფილი დეპუტატი ხათუნა ხოფერია სოციალურ ქსელში გარდაცვლილი პოლიტიკოსების ფოტოს და სტატუსს აქვეყნებს:
"რა მიკვირს იცი, როგორ გძინავს ღამე?!
შენ ხომ ყოველ მათგანს ახლოს იცნობდი... ზოგთან, მეგობრობდი კიდეც...
ხვდები რა საცოდავი ხარ?! ადამიანები მოგონებებით ცხოვრობენ. წარსულს იხსენებენ და მომავალს ამ გადმოსახედიდან უყურებენ. შენ წარსულის გახსენებისაც გეშინია.
წარსულში, თუ ვინმესთან ერთად პური გიჭამია, ღვინო დაგილევია, დრო გიტარებია, საქმე გიკეთებია, ყველასგან დაწყევლილი ხარ! ყველა ლუკმა არამია შენთვის, ყველა წყლის წვეთი შენგან სასიკვდილოდ გამეტებული მეგობრების სისხლად გექცა.
შენ საკუთარი წარსულის გეშინია...
შენ მომავლისაც გეშინია! იმ ერთადერთი გარდაუვალის - სიკვდილის. რადგან იცი, რომ ვერც სასუფეველში დაიმკვიდრებ ადგილს, რადგან შენგან სიკვდილისთვის გამეტებული ადამიანები გეგულებიან იქაც...
ხვდები, რა საცოდავი ხარ?!... მშიშარა, რომელიც აწმყოში ცხოვრობ მხოლოდ... აქ, ამ წამს, ამ ასაკში... და მორჩა.. შენ არც წარსულში ხარ და არც მომავალში.
შეხედე ამ ადამიანებს!
ესენი არიან შენი წარსული!
ესენი არიან შენი მომავალი!", - წერს ხოფერია.
