არ არის ეს არც მერიის, არც გამგეობის პროექტი, ეს კერძო ინიციატივაა - კახა კალაძე სოციალურ ქსელში გავრცელებული სკამების ფოტოებზე
დედაქალაქის მერი კახა კალაძე გოგებაშვილის ქუჩაზე განთავსებულ სკამებთან დაკავშირებით გავრცელებულ ფოტოებს ეხმაურება და ამბობს, რომ მსგავსი პროექტი არც მერიას და არც გამგეობას არ ჰქონია.
კალაძის თქმით, გოგებაშვილის ქუჩაზე განთავსებულ სკამებში არა ნაგვის ურნები, არამედ ყვავილების ქოთნებია ჩამონტაჟებული, რომელიც ორი ახალგაზრდის კერძო ინიციატივაა.
„ეს ძალიან დიდი ტყუილი და სიცრუეა. მინდა რეალობა ვუთხრა საზოგადოებას, ეს არ არის არც მერიის, არც გამგეობის პროექტი. ეს არის ორი ადამიანის გაკეთებული პროექტი, რომელთაც უყვართ ქალაქი. ამ ორმა ახალგაზრდამ იჯარით აიღო ფართი, სადაც რესტორანს აკეთებენ, მათ მოწესრიგების თვალსაზრისით განათავსეს მოსასვენებელი სკამები, რომელსაც დამონტაჟებული აქვს საყვავილეები.
პირველი ცრუ ინფორმაცია იყო იმასთან დაკავშირებით, რომ რა სისულელე მოიგონა მერმა, არ ეყოფათ ის რაც ჭავჭავაძეზე გააკეთესო? ჭავჭავაძის ქუჩა არის ერთ-ერთი საუკეთესო მაგალითი, როგორ უნდა მოხდეს ქუჩების დაპროექტება თბილისში თავისი მიწისქვეშა ურნებით. აბა ის მოწონდა ხალხს, რომ ვირხთები და სუნი იყო? აბა ჰკითხეთ ვაკეში მცხოვრებ ადამიანებს მოსწონთ თუ არა“,- განაცხადა კახა კალაძემ.
ცნობისთვის, გუშინ სოციალურ ქსელში გოგებაშვილის ქუჩაზე მდგარი სკამების ფოტოები გავრცელდა, რომელზეც ეწერა, რომ მერიამ ურნები სკამებში დაამონტაჟა.
