„ჯორჯიან უოთერ ენდ ფაუერი“ განცხადებას ავრცელებს
„ჯორჯიან უოთერ ენდ ფაუერი“ კომპანიის კონტრაქტორი მძღოლების საპროტესტო აქციასთან დაკავშირებით კიდევ ერთ განცხადებას ავრცელებს.
როგორც განცხადებაშია ნათქვამი, კომპანიის ადმინისტრაციასთან მოლაპარაკების შედეგად, „ჯორჯიან უოთერ ენდ ფაუერის“ კონტრაქტორი მძღოლები მზად არიან, გააგრძელონ მუშაობა და შეასრულონ ხელშეკრულებით გათვალისწინებული ვალდებულებები.
„რაც შეეხება კონტრაქტორების იმ მცირე ჯგუფს, რომელთა მხრიდანაც გამოვლინდა აგრესიული, ძალადობრივი და სხვა სახის უკანონო ქმედებები, რაც ცალსახად მიუღებელია კომპანიისთვის, „ჯორჯიან უოთერ ენდ ფაუერის“ ადმინისტრაციის მიერ მათ მიმართ განხორციელდება შესაბამისი სამართლებრივი ქმედებები.
„ჯორჯიან უოთერ ენდ ფაუერი“ ჩვეულ რეჟიმში, შეფერხების გარეშე აგრძელებს მიმდინარე საქმიანობას, მათ შორის წყალმომარაგების სისტემის სტაბილურობისთვის კომპანიის მიერ დაგეგმილი და გადაუდებელი სამუშაოების შესრულებას. თბილისის უწყვეტ წყალმომარაგებას არანაირი საფრთხე არ შეექმნება“, – აცხადებენ კომპანიაში.
ცნობისთვის, კომპანია „ჯორჯიან უოთერ ენდ ფაუერის“ ავტოსატრანსპორტო დეპარტამენტის კონტრაქტორი თანამშრომლები გუშინ გაიფიცნენ. ისინი კომპანიისგან ანაზღაურების მომატებასა და კუთვნილ შვებულებას ითხოვენ.
