თურქეთის თავდაცვის მინისტრი: პოლიტიკური განცხადებები ისტორიას ვერ შეცვლის
თურქეთის თავდაცვის მინისტრმა, ჰულუსი აქარმა განაცხადა, რომ 1915 წლის მოვლენებზე სიტყვა გენოციდის გამოყენებით აშშ-ის პრეზიდენტმა, ჯო ბაიდენმა ისტორიული რეალობა დაამახინჯა.
თურქეთის თავდაცვის მინისტრმა აღნიშნა, რომ პოლიტიკური განცხადებები ისტორიას ვერ შეცვლის.
„მხოლოდ განცხადებებით შეუძლებელია ისტორიის გადაწერა. წარსულის თემების შუღლისა და დაპირისპირების გაღვივების მიზნით გამოყენება დაუშვებელია“, - განაცხადა ჰულუსი აქარმა.
თურქეთის თავდაცვის უწყების ხელმძღვანელმა ასევე აღნიშნა, რომ „თურქ და სომეხ ხალხს შორის მოვლენების გენოციდად დახასიათება ჩამორჩენილობისა და უვიცობის მაჩვენებელია“.
„ამგვარი ნაბიჯები რეგიონში ურთიერთობების მომავალს დააზიანებს“, - განაცხადა მან.
24 აპრილს აშშ-ის პრეზიდენტმა, ჯო ბაიდენმა ოსმალეთის იმპერიის მიერ, 1915-1923 წლებში, სომეხთა გენოციდი ოფიციალურად აღიარა. საპასუხოდ, ოფიციალურმა ანკარამ განაცხადა, რომ აშშ-ის ხელისუფლება უგულებელყოფს ისტორიას და ლობისტების მოთხოვნებს ემორჩილება. ჯო ბაიდენის განცხადების გამო, აშშ-ის ელჩი თურქეთის საგარეო საქმეთა სამინისტროში დაიბარეს.
