2020 წელს სამხედრო ხარჯებმა მსოფლიოში რეკორდი დაამყარა
სტოკჰოლმის საერთაშორისო ინსტიტუტის კვლევების მიხედვით, მსოფლიოში სამხედრო ხარჯებმა 2020 წელს რეკორდი დაამყარა და 2 ტრილიონი აშშ დოლარი შეადგინა. ამის შესახებ „ანადოლუ“ იუწყება.
ეს სამხედრო ხარჯების ყველაზე მაღალი მაჩვენებელია 1988 წლიდან. 2019 წელთან შედარებით სამხედრო ხარჯები 2,6%-ით გაიზარდა.
კვლევების მიხედვით, კორონავირუსის პანდემიას სამხედრო ხარჯებზე მნიშვნელოვანი ზეგავლენა არ მოუხდენია.
აშშ-ის სამხედრო ხარჯები საერთო მოცულობის 39%-ს შეადგენს და 778 მილიარდი აშშ დოლარია. მოწინავე ხუთეულში შევიდნენ ასევე ჩინეთი, ინდოეთი, რუსეთი და დიდი ბრიტანეთი, რომელთა წილი საერთო ხარჯების 62%-ს შეადგენს.
აშშ თავისი სამხედრო ბიუჯეტის უდიდეს ნაწილს ბირთვული არსენალის მოდერნიზებაზე და ახალი ტიპის შეიარაღების შეძენაზე ხარჯავს. რაც შეეხება ჩინეთს, მისი სამხედრო ხარჯები 2020 წელს წინა წლებთან შედარებით მნიშვნელოვნად არ შეცვლილა.