გიორგი კაკაურიძე: „ოქროს სიის“ გაუქმება სწორი გადაწყვეტილება იყო

„ოქროს სიის“ გაუქმება აბსოლუტურად სწორი გადაწყვეტილება იყო, - აღნიშნა ფინანსთა მინისტრის პირველმა მოადგილემ, გიორგი კაკაურიძემ ფრაქცია „ლელოს“ სხდომაზე საბაჟო კონტროლის ღონისძიებებზე დასმული კითხვის საპასუხოდ.

მისი თქმით, არცერთ ქვეყანაში არ არსებობს იმპორტზე ისეთი შეღავათები, როგორი შეღავათებიც საქართველოში იყო.

„ბევრს შეიძლება კიდევ არ მოეწონოს ეს განცხადება, მაგრამ „ოქროს სიის“ გაუქმება იყო აბსოლუტურად სწორი გადაწყვეტილება. არცერთ ქვეყანაში არ არსებობს იმპორტზე ისეთი შეღავათები, როგორიც საქართველოში იყო. იმპორტი იყო გაცილებით უკეთეს პირობებში, ვიდრე ადგილობრივი წარმოება, რაც არ არის სწორი პოლიტიკა. იმპორტზე ყველამ უნდა გადაიხადოს გადასახადი. შეიძლება შეღავათი იყოს პროცედურების ნაწილში და მაგალითად კომპანიებს, რომლებიც მაღალი სანდოობით სარგებლობენ, ჰქონდეთ პროცედურული შეღავათი, თუმცა, თანხის გადახდასთან დაკავშირებით, შეღავათი არ არსებობს არცერთ ქვეყანაში, ამიტომ, „ოქროს სია“ არ იყო სწორი მოდელი და იყო გასაუქმებელი. ადმინისტრირების კუთხითაც ძალიან მნიშვნელოვანი ღონისძიებების გატარების საშუალება მოიტანა იმან, რომ „ოქროს სია“ აღარ გავქვს. კიდევ ვიმეორებ, ამ საკითხში შეიძლება ბევრი არ დამეთანხმოს, მათ შორის, ბევრი იმპორტიორი, თუმცა, ქვეყნის ეკონომიკისთვის და ასევე, ფისკალურად ეს იყო ძალიან სწორი გადაწყვეტილება“, - განაცხადა ფინანსთა მინისტრის პირველმა მოადგილემ.