წლის ბოლომდე, თბილისში დაუმთავრებელი მშენებლობების პრობლემა 90-95%-ით მოგვარდება - ილია ელოშვილი
მიმდინარე წლის ბოლომდე თბილისში დაუმთავრებელი მშენებლობების პრობლემა 90-95%-ით მოგვარდებ, - ამის შესახებ დედაქალაქის მერის მოადგილემ, ილია ელოშვილმა პრეზენტაციაზე განაცხადა, სადაც კახა კალაძემ საზოგადოებას თბილისის ჯანდაცვისა და სოციალური პოლიტიკის მიმართულებით, 2018-2021 წლებში განხორციელებული პროექტების შესახებ ანგარიში წარუდგინა.
დედაქალაქის მერის მოადგილის განცხადებით, თბილისის მასშტაბით, დაუმთავრებელ მშენებლობებთან დაკავშირებული საკითხების განმხილველი კომისიის მიერ 33 ობიექტზე უკვე გაიცა რეკომენდაცია და ნებართვების აღების პროცესი მიმდინარეობს.
„ჩონჩხებს“, რომლებიც ქალაქშია, თვალი მივაჩვიეთ, თითქოს, ისინი ქალაქის შემადგენელი ნაწილნი გახდნენ, თუმცა, ეს დაუმთავრებელი მშენებლობები უდიდესი საფრთხის შემცვლელია, როგორც სანიტარიული, ასევე, უსაფრთხოების კუთხით და ქალაქის იერსახეს ამახინჯებს. ამ ყველაფრის უკან კი დიდი სოციალური ტრაგედია დგას. არიან ოჯახები, რომელთაც სავარაუდოდ, ცხოვრებაში ერთხელ ჰქონდათ შესაძლებლობა, საკუთარი ბინის შეძენის, თანხა შეიტანეს და მოტყუებული დარჩნენ. 13 000 ოჯახია დაზარალებული, მათ შორის, დიდი ნაწილი ემიგრანტები არიან. ჩვენი მთავარი ამოცანა თავიდანვე იყო ის, რომ მიუხედავად ურთულესი პრობლემისა, არცერთი დაუსრულებელი მშენებლობა არ იყოს ქალაქში. ამისთვის შევქმენით სპეციალური კომისია და დავიწყეთ მუშაობა. აქ მინდა გამოვყო დედაქალაქის საკრებულოს როლი, რადგან ეს კომისია ერთობლივია. კომისიამ 33 დაუმთავრებელ სამშენებლო ობიექტზე უკვე გასცა რეკომენდაციები და ნებართვების აღების სტადიაშია. აქედან 18 მისამართზე სამშენებლო პროცესი და პროცედურები უკვე დაწყებულია.
არსებული 179 ობიექტიდან ყველაზე დიდი იყო პირველი ხუთი პროექტი, ანუ 80%-ს შეადგენს „ცენტრ პოინტის“, „სვეტის“, „ოლიმპიური ვარსკვლავის“ დაუმთავრებელი მშენებლობები, რომლებიც წლების განმავლობაში იყო გაჩერებული. დღეს, 8 362 მისამართზე უკვე მიმდინარეობს სამშენებლო ან სარემონტო პროცესები. დარჩენილ 2 000-დან 3 000-მდე დაზარალებულის დასაკმაყოფილებლადაც შესაბამის ნაბიჯებს ვდგამთ. მიმდინარეობს სანებართვო პროცედურები და დარწმუნებული ვარ, რომ წლის ბოლომდე ამ პრობლემას 90-95%-ით მოვაგვარებთ“, - აღნიშნა ილია ელოშვილმა.
