ძალადობას, ტერორს, სადიზმს დღეს ერთი სახელი აქვს - ბუჩა - კახა კალაძე
თბილისის მერი უკრაინაში განვითარებულ მოვლენებს გამოეხმაურა. მის თქმით, არცერთი სიტყვა ზუსტად არ გამოხატავს იმ საშინელ ვითარებას, რაც ბუჩაში ხდება.
"ძალადობას, ტერორს, სადიზმს დღეს ერთი სახელი აქვს - ბუჩა. არცერთი სიტყვა ზუსტად არ გამოხატავს იმ საშინელებას, რომელიც ბუჩაში ვიხილეთ.
დარწმუნებული ვარ, ეს შემზარავი დანაშაული არ დარჩება დაუსჯელი. სამძიმარს ვუცხადებ უკრაინელ ხალხს ამ მძიმე წუთებში!", - წერს კახა კალაძე.
უკრაინის ქალაქ ბუჩადან რუსეთის შეიარაღებული ძალების გასვლის შემდეგ, ქალაქში მშვიდობიანი მოქალაქეების სასტიკად ნაწამები ცხედრები იპოვეს.
