"საქართველოს ომში ჩათრევა უნდათ და დიალოგი მოსკოვთან, ნეიტრალიტეტზე ახლა ლაპარაკი იმიტომაა აუცილებელი, რომ ჩვენ ავცდეთ უბედურებას!" - ირმა ინაშვილი

"პატრიოტთა ალიანსის" ლიდერი, ირმა ინაშვილი საქართველოს ომში ჩათრევის მცდელობებზე საუბრობს და ქვეყნის გადარჩენის გზად მოსკოვთან ნეიტრალიტეტზე საუბარს მიიჩნევს.

"19 თებერვალს, მიუნხენში, გერმანიის კანცლერმა შოლცმა საჯაროდ განაცხადა, რომ თუ უკრაინა ნეიტრალიტეტს აირჩევს, ეს დასავლეთსა და რუსეთს შორის დაპირისპირებას ჩააქრობს. მაშინ ზელენსკიმ უარი თქვა. ბოლო ერთი თვეა კი, თავად აცხადებს, რომ ნატოს იმედი აღარ აქვს და ნეიტრალიტეტის გარდა, სხვა გზას ვერ ხედავს. შეთანხმების ტექსტის ვერსიაც გადასცეს რუსულ მხარეს, სადაც უკრაინა სწორედ ნეიტრალიტეტს ითხოვს. 8 აპრილს ზელენსკიმ გერმანულ გამოცემას "ბილდი" სატელევიზიო ინტერვიუში განუცხადა, რომ დღეს უკრაინას სხვა გზა არა აქვს, გარდა იმისა, რომ მოლაპარაკების მაგიდასთან იჯდეს მოსკოვთან და ახლა პუტინთან შეხვედრას იხვეწება. ახლახანს პრეზიდენტ მაკრონისგან შევიტყვეთ, რომ პრეზიდენტ პუტინთან მუდმივი კავშირი აქვს და ამას ხშირად ზელენსკის თხოვნით აკეთებს. ამხელა ტრაგედია, ამდენი მსხვერპლი, 11 მილიონი ლტოლვილი ხომ არ იქნებოდა, ჯერ კიდევ 19 თებერვალს ზელენსკის ნეიტრალიტეტისთვის რომ დაეჭირა მხარი?!

ახლა უკრაინაში დიდი უბედურება ტრიალებს. ამ ფონზე ზელენკის მთავრობა საქართველოს მხარდაჭერის ხარისხით, თურმე, უკმაყოფილოა. სინამდვილეში, ვიმეორებ: საქართველოს ომში ჩათრევა უნდათ და დიალოგი მოსკოვთან, ნეიტრალიტეტზე ახლა ლაპარაკი იმიტომაა აუცილებელი, რომ ჩვენ ავცდეთ უბედურებას, საქართველო აცდეს უბედურებას!!!!!!!!!
ეს ყველა გონიერ ადამიანს ესმის", - წერს ინაშვილი.

შეგახსენებთ, რომ რუსეთი უკრაინაში 24 თებერვალს შეიჭრა. რუსულ სამხედრო აგრესიას ათასობით მშვიდობიანი მოქალაქე ემსხვერპლა, მილიონობით ადამიანი კი დევნილად და ლტოლვილად იქცა. რაშისტები არ ინდობენ ქალებს და ბავშვებს, მათ აუპატიურებენ, აწამებენ და ხვრეტენ.