აგვისტოს 5-დღიანი ომი - რუსეთი საქართველოს ოკუიპაციას კვლავ განაგრძობს

რუსეთ-საქართველოს 5-დღიანი ომიდან 7 აგვისტოს ზუსტად 14 წელი გავიდა, თუმცა კრემლის დამპყრობლური პოლიტიკა საქართველოს წინააღმდეგ კვლავ გრძელდება და მოსკოვის დირექტივებით, საოკუპაციო რეჟიმის წარმომადგენლების მიერ საქართველოს მიწების მიტაცება, ფაქტობრივად, ყოველდღიურად ხორციელდება.

2008 წელს რუსული საოკუპაციო ძალების სამხედრო ინტერვენციას 228 მშვიდობიანი მოქალაქე, 170 სამხედრო და 14 პოლიციელი ემსხვერპლა, ხოლო საქართველოს 2 232 მოქალაქე დაიჭრა და დაშავდა; რუსული აგრესიის შედეგად, საქართველოს ტერიტორიაზე 263 598-მდე გაიზარდა დევნილთა რაოდენობა; საქართველომ კონტროლი დაკარგა 151 დასახლებულ პუნქტზე.

2008 წლის 26 აგვისტოს რუსეთმა სამხრეთ ოსეთისა და აფხაზეთის ე.წ. რესპუბლოკების დამოუკიდებლობა ცნო და მათი ოკუპაცია განახორციელა. რუსეთი დღემდე აკონტროლებს საქართველოს ამ ტერიტორიებს.

საოკუპაციო რეჟიმის მიერ ე.წ. მცოცავი ოკუპაცია დღემდე გრძელდებეა. საოკუპაციო ძალები აგრძელებენ საქართველოს ხელისუფლების მიერ კონტროლირებად ტერიტორიების მიტაცებას და საოკუპაციო ხაზთან მცხოვრები ადამიანების გატაცებას. საერთაშორისო სამართლის უგულვებელყოფით რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას.