"გავიგე, ღუმელი ესროლა მეუღლესო... სავარაუდოდ ნასვამი იყო" - გურჯაანში მომხდარი საზარელი შემთხვევის დეტალები
გურჯაანში მომხდარ საზარელ შემთხვევასთან დაკავშირებით ადგილობრივები ახალ დეტალებს ჰყვებიან.
დაკავებულის მეზობელი ამბობს, რომ ჩხუბის დროს მამაკაცი, სავარაუდოდ, ნასვამი იყო.
"მე როგორც გავიგე, ღუმელი ესროლა მეუღლეს, რომელსაც ბავშვი ეჭირაო. ჩამქრალი ღუმელი აიღო, ცოლმა ვერ აანთო ეტყობა და ესროლაო. ამ ბავშვს გულის პრობლემები ჰქონდა, ოპერაცია ჰქონდა გადატანილი. ბრალდებულს პირველ მეუღლესთან სამი შვილი ჰყავს, რომლებიც ამჟამად მინდობით აღზრდაში იმყოფებიან. ეს მეორე მეუღლეა" - ამბობს ერთ-ერთი ადგილობრივი.
როგორც ირკვევა, ეს პირველი შემთხვევა არ არის, როდესაც ბრალდებული ოჯახში ძალადობისთვის დააკავეს. ერთ-ერთი ადგილობრივის თქმით, მოძალადემ სამი თვის წინ მეუღლეს და შვილებს სცემა და პოლიციამ ის ერთი დღით დააკავა.
კაცმა ცოლს მაშინ დაარტყა, როცა ხელში ჩვილი ეჭირა, ბავშვმა გონება დაკარგა და დაიღუპა. შსს-მ 8 თვის ბავშვის გარდაცვალების ფაქტზე მისი მამა დააკავა.
