აზერბაიჯანელი „კანონიერი ქურდი“, რომელსაც დაბადების დღეზე „სპეცრაზმმა დაუჩოქა“, მოსკოვში ჩაცხრილეს

მოსკოვში ცნობილი აზერბაიჯანელი „კანონიერი ქურდი“ ქურდი ალი გეიდაროვი ჩაცხრილეს.

40 წლის გეიდაროვს კრიმინალურ წრეებში ალბერტ „რიჟას“ მეტსახელით ოცნობდნენ.

მკვლელობა მოსკოვის ჩრდილო-დასავლეთში, ელიტურ საცხოვრებელ კომპლექსთან (Alye Parusa) მოხდა.

აღსანიშნავია, რომ ბოლო პერიოდში ალი გეიდაროვი რუსული FSB-ს სამიზნეს წარმოადგენდა. ეს მას შემდეგ, რაც „კანონიერი ქურდის“ დაბადების დღეზე მისმა გარემოცვამ უჩვეულო პერფორმანსი მოაწყო – იანვრის ბოლოს ალი გეიდაროვმა 40 წლის იუბილე აღნიშნა ოდინცოვის რესტორან “ოჩაგში”. მოულოდნელად რესტორნაში „ომონის“ ფორმაში გამოწყობილი მებრძოლები შეიჭრნენ და როგორც კი სტუმრები ხელებაწეულნი, იატაკზე დაწოლას აპირებდნენ, უჩვეული სანახაობის მომსწრენი აღმოჩნდნენ – სპეცრაზმმა იუბილარის წინაშე დაიჩოქა.

სინამდვილეში ეს „კანონიერი ქურდის“ საპატივსაცემოდ დადგმული კოსტუმირებული პერფომანსი აღმოჩნდა, რომლის ამსახველი ვიდეო სტუმრებმა თავადვე გაავრცელეს.

ვიდეოს სოციალურ ქსელში დიდი გამოხმაურება მოჰყვა. ჩანაწერი ყველა რესურსიდან წაშლილია, FSB-მ კი ალი გეიდაროვზე ნადირობა გამოაცხადა.

”90-იან წლებშიც კი, ბანდიტებს საკუთარი თავისთვის არ მიუციათ იმის უფლება, რასაც ახლა კანონიერი ქურდები აკეთებენ მოსკოვში, ზოგიერთი სამართალდამცავი ორგანოს იმუნიტეტის წყალობით,” – ამბობს რუსი ექსპერტი ვიქტორია გეფტერი.

ალი გეიდაროვი „კანონიერ ქურდად“ 2012 წელს „აკურთხეს“. ის აზერბაიჯანული კლანის გავლენიან ლიდერად მიიჩნეოდა.