ინდოეთში, კოვიდკლინიკაში გაჩენილ ხანძარს 10-ზე მეტი ადამიანი ემსხვერპლა
ინდოეთში, მაჰარაშტრას შტატში, მუმბაისთან ახლოს მდებარე კოვიდკლინიკაში ხანძარი გაჩნდა. დაღუპულია, სულ მცირე, 13 ადამიანი, - ამის შესახებ BBC წერს.
ქვეყნის ჯანდაცვის უწყება განმარტავს, რომ ცეცხლი ინტენსიური ზრუნვის განყოფილებაში გაჩნდა, ხანძრის მიზეზი, ჯერჯერობით უცნობია და მიმდინარეობს გამოძიება.
ინდოეთი კორონავირუსის პანდემიის მეორე ტალღას ებრძვის. ჯანდაცვის სექტორი გადატვირთულია; საავადმყოფოებში ჟანგბადის მარაგის, საწოლებისა და ფილტვების ხელოვნური ვენტილაციის აპარატების კრიტიკული დეფიციტია.
ქვეყანაში კორონავირუსის დადასტურებული შემთხვევების რაოდენობა უკვე 16 მილიონს აჭარბებს. ვირუსს 187 ათასზე მეტი ადამიანი ემსხვერპლა.