Adobe-ის თანადამფუძნებელი და PDF-ფორმატის შემქმნელი ჩარლზ გეშკე გარდაიცვალა
ბიზნესმენი, კომპანია Adobe-ის თანადამფუძნებელი ჩარლზ გეშკე გარდაიცვალა. ინფორმაცია ამის შესახებ კომპანიის ვებგვერდზე გამოქვეყნდა.
გეშკე 81 წლისა იყო, მისი გარდაცვალების მიზეზი ამ ეტაპზე არ სახელდება.
„ეს დიდი დანაკარგია Adobe-ისთვისა და ტექნოლოგიების ინდუსტრიისთვის, რომლისთვისაც გეშკე ათწლეულების განმავლობაში გმირი და მაგალითი იყო“, - დაწერა კომპანიის გენერალურმა დირექტორმა შანტანუ ნარაიენმა.
გეშკემ Adobe-ი 1982 წელს, ჯონ უორნოკთან ერთად დააარსა. მოგვიანებით მათ შეიმუშავეს ფორმატი Portable Document Format (PDF). 2009 წელს აშშ-ის პრეზიდენტმა, ბარაკ ობამამ გეშკე და უირნოკი ტექნოლოგიებისა და ინოვაციების სფეროში აშშ-ის ეროვნული მედლით დააჯილდოვა.
