რუსეთის თავდასხმებს უკრაინაში, გასული დღის განმავლობაში, 8 ადამიანი ემსხვერპლა - დაშავებულია 53

უკრაინაში, გასული დღის განმავლობაში, რუსეთის თავდასხმების შედეგად 8 ადამიანი დაიღუპა, მათ შორის 1 ბავშვი და 53 დაშავდა. ამის შესახებ ინფორმაციას რეგიონული ხელისუფლება ავრცელებს.

ხარკოვის ოლქის გუბერნატორის, ოლეგ სინეგუბოვის განცხადებით, რუსეთის თავდასხმებს ქალაქ ხარკოვსა და სამ რეგიონულ დასახლებაზე 2 ადამიანი ემსხვერპლა, დაშავდა 21. ასევე, დაზიანდა სახლები, ბაზარი, საავადმყოფო, სასტუმრო, საწყობები და სხვა შენობები.

გუბერნატორ ვადიმ ფალაშკინის ინფორმაციით, დონეცკის ოლქში, რამდენიმე დასახლებულ პუნქტში რუსული თავდასხმის შედეგად 13 ადამიანი დაშავდა. მისივე თქმით, განადგურდა ან დაზიანდა თითქმის 40 სახლი, ცხრა საცხოვრებელი კორპუსი, ინფრასტრუქტურის ობიექტი, საწარმო, ადმინისტრაციული შენობა, მაღაზიები და ენერგეტიკული ინფრასტრუქტურა.

ღამით, კრივი რიჰზე რუსული სარაკეტო შეტევის შედეგად 3 ადამიანი დაიღუპა, მათ შორის 12 წლის ბიჭი, დაშავდა ასევე სამი, მათ შორის ერთი მოზარდი. დნეპროპეტროვსკის ოლქის გუბერნატორის სერჰი ლისაკის განცხადებით, დარტყმების შედეგად დაშავდა ორი კაცი 19 და 53 წლის დნიპროში და 38 წლის ქალი ნიკოპოლის რაიონში. ასევე, დნეპროპეტროვსკის ოლქზე თავდასხმების შედეგად დაზიანდა 20-ზე მეტი სახლი, სამი საცხოვრებელი კორპუსი, საგანმანათლებლო დაწესებულება, სკოლა და საწარმო.

რუსებმა სუმის ოლქში რამდენიმე დასახლებულ პუნქტსაც დაარტყეს. რეგიონის ადმინისტრაციის ცნობით, შედეგად 1 მშვიდობიანი მოქალაქე დაიღუპა და 2 დაიჭრა. გავრცელებული ინფორმაციით, ბოლო დღის განმავლობაში სუმის ოლქზე თავდასხმისთვის რუსებმა არტილერია, დრონები, ნაღმმტყორცნები, მართვადი საჰაერო ბომბები და მრავალჯერადი სარაკეტო სისტემები გამოიყენეს.

ხერსონის გუბერნატორის, ალექსანდრ პროკუდინის განცხადებით, რუსეთის იერიშს ქალაქ ხერსონსა და 23 რეგიონულ დასახლებაზე 2 ადამიანი ემსხვერპლა, დაშავდა 7. მისივე ცნობით, ხერსონის ოლქში საცხოვრებელი კორპუსი, 23 სახლი და სასოფლო-სამეურნეო ტექნიკა დაზიანდა.

ოდესის ოლქის გუბერნატორმა ოლეგ კიპერმა განაცხადა, რომ 20 სექტემბერს რუსეთის სარაკეტო დარტყმამ ქალაქ ოდესაზე ოთხი ადამიანი დაჭრა. კიპერის ცნობით, რუსეთმა "ისკანდერ-მ" ბალისტიკური რაკეტები გაუშვა ოდესაში, რამაც დააზიანა პორტი და სამოქალაქო ინფრასტრუქტურა, ასევე ანტიგუანის დროშის ქვეშ მყოფი სამოქალაქო გემი.