ხაშურელმა დეპუტატმა ჭონაზე მისულ ბავშვებს 100-100 ლარი აჩუქა
29 აპრილის საღამოს, ხაშურის მუნიციპალიტეტის სოფელ ოსიაურში 8-დან 10 წლამდე ასაკის 9 ბავშვი ტრადიციულ ჭონაზე გაეშურა. ჯერ სულ ხუთიოდე კვერცხი ჰქონდათ შეგროვილი, გია და რომან მეტივიშვილების სახლს რომ მიადგნენ.
სახლიდან, ოჯახის სიძე ლევან გამრეკელი გამოვიდა და მანქანისკენ გაეშურა. მას წითელი კვერცხი არ აღმოაჩნდა, გადაწყვიტა პატარებისთვის გული არ დაეწყვიტა და ხელცარიელი არ გაეშვა. გამრეკელმა თითოეულს 100 ლარი აჩუქა.
ერთ-ერთმა არასრულწლოვანმა საჩუქრის ფოტო სოციალურ ქსელში გამოაქვეყნა.
– ჭონა უძველესი ხალხური ტრადიციაა, ადრე, ამ რიტუალის დროს, მოზრდილებიც დადიოდნენ სოფელში, კვერცხის გარდა, სურსათს აგროვებდნენ, მერე კი ერთად იკრიბებოდნენ და ლხინს მართავდნენ. ეს ტრადიცია სოფლების უმეტესობაში მიივიწყეს, ზოგან კი მხოლოდ ბავშვების სახალისო რიტუალად შემორჩა, სწორედ ამიტომ გადავწყვიტე, წამეხალისებინა, ვკითხე, რამდენი იყვნენ, 9 ბავშვი აღმოჩნდა და 900 ლარი ვაჩუქე, მაგრამ ამ თემაზე მეუხერხულება ლაპარაკი, – აღნიშნა ლევან გამრეკელმა.
გამრეკელი “ქართული ოცნებიდან” ხაშურის მუნიციპალიტეტის ოსიაურის თემიდან საკრებულოს წევრი ამომრჩეველთა ხმების 97 %-ით გახდა. მას ხელფასი არასდროს აუღია და თანხა ჯერ შეზღუდული შესაძლებლობების მქონე ბავშვთა სახლის, შემდეგ სურამის ფსიქიატრიული კლინიკის და ასევე, სურამისა და ხაშურის ეპარქიის ტერიტორიაზე მშენებარე ბანას სამონასტრო-საგანმანათლებლო პროექტის ანგარიშზე ირიცხებოდა.
– ვიდრე მუნიციპალიტეტის საკრებულოს წევრი გავხდებოდი, რამდენიმე მიმართულებით ბიზნესს ვაწარმოებდი, ახლა კი, ფერმერულ მეურნეობას და ოჯახის სხვა ბიზნესსაქმიანობას ჩემი ძმა, შვილი და მეუღლე მართავენ, – ამბობს გამრეკელი.
ჭონაზე, აღდგომის კვირის ხუთშაბათიდან შაბათის ჩათვლით, მოზარდები იკრიბებიან და სიმღერ-სიმღერით კარიკარ შემოივლიან სოფელს, მერე კი შეგროვილ კვერცხებს ინაწილებენ.
akhalitaoba.ge
