როდის დასრულდება საქართველოში პანდემია? - თენგიზ ცერცვაძე თარიღს ასახელებს

ინფექციური საავადმყოფოს გენერალური დირექტორის, თენგიზ ცერცვაძის ვარაუდით, წლის ბოლოსთვის საქართველოში პანდემია დასრულდება.

როგორც ცერცვაძე განმარტავს, ივლისიდან დღეში კოვიდვაქცინით უნდა აიცრას 15 000-მდე ადამიანი, მხოლოდ ასეთ პირობებში იქნება შესაძლებელი, წლის ბოლოსთვის მოსახლეობის 65% იყოს აცრილი.

"მართალია მესამე ტალღის პიკმა გადაიარა, ჯერჯერობით ვერ ვახერხებთ დრამატულ შემცირებას შემთხვევების რაოდენობისას. ეს ჯერ არ იძლევა სრული სიმშვიდის საშუალებას, იმისთვის, რომ შემთხვევები კიდევ უფრო შემცირდეს ფაქტობრივად გახდეს დღეში 100-200 შემთხვევა, ისევ რჩება ყველაზე აქტუალურად პირბადეების ტარება და სოციალური დისტანცირება.

ვაქცინირებულთა რიცხვი საქართველოში დიდი არ არის, მართალია ყოველდღე ვცრით 5000 ადამიანს, დღეისთვის გვაქვს 180 000-მდე ვაქცინაცია და სრულად ვაქცინირებულია 40 000-მდე ადამიანი, ეს ჯერ ძალიან ცოტაა. მგონია, რომ შემთხვევების შემდგომ ზრდას არ უნდა ველოდეთ, ივლისისთვის უნდა ველოდეთ შემთხვევების კლებას. თან ივლისისთვის უკვე გამოიკვეთა მყარი გარანტიები, რომ ივლისის დასაწყისში შემოვა შეუზღუდავი რაოდენობით ვაქცინები, მათ შორის სხვადასხვა წარმოების და ქვეყანა შეძლებს საყოველთაო ვაქცინაციაზე გადასვლას. თუ დღეს ვცრით 5000 ადამიანს, ივლისიდან დღეში უნდა აიცრას 15 000-მდე ადამიანი, მხოლოდ ასეთ პირობებში შევძლებთ, რომ წლის ბოლოსთვის აცრილი გვყავდეს მოსახლეობის 65%, ამას დაემატება კოვიდგადატანილები და გვექნება ყველა პირობა, რომ წლის ბოლოსთვის პანდემიას გავუმკლავდეთ. ძალიან დიდი იმედი მაქვს, რომ წლის ბოლოსთვის საქართველოში დავასრულებთ პანდემიას, მანამდე ზაფხულს შევხვდებით შედარებით კარგი მაჩვენებლებით“, – განაცხადა ცერცვაძემ.