„სკაი სპორტი“ - კვარაცხელიას დამშვიდობება „ნაპოლის“ თითოეული წევრისთვის ძალიან ემოციური იყო
საფრანგეთში გამგზავრებამდე ხვიჩა კვარაცხელია კასტელ ვოლტურნოში „ნაპოლის“ ბაზაზე იმყოფებოდა. ის თანაგუნდელებს დაემშვიდობა და მათთან ერთად სამახსოვრო ფოტო გადაიღო, – ამის შესახებ ინფორმაციას „სკაი სპორტი“ ავრცელებს.
„ეს იყო ბოლო დღე კასტელ ვოლტურნოში ქართველი ფეხბურთელისთვის, რომელიც სპორტულ ცენტრს დილით ესტუმრა, რათა აეღო პირადი ნივთები. ამავე დროს კვარაცხელიას თანაგუნდელებთან დამშვიდობება სურდა.
ხვიჩა დაემშვიდობა თანაგუნდელებს, „ნაპოლის“ მთავარ მწვრთნელს, ანტონიო კონტესა და გუნდის პერსონალს. ქართველმა ტალანტმა მათ სიტყვით მიმართა და შემდეგ გასახდელში გადაიღო ერთობლივი ფოტო, სადაც ყველა დამსწრემ ავტოგრაფი დატოვა. ეს ყველასთვის ძალიან ემოციური მომენტი იყო.
ბოლოს კვარას ანტონიო კონტემ მიმართა. მწვრთნელმა სინანული გამოთქვა ქართველი მოთამაშის წასვლის გამო. ხვიჩა კვარაცხელია „პარი სენ-ჟერმენთან“ ხუთწლიან ხელშეკრულებას გააფორმებს“, – წერს „სკაი სპორტი“.
