„ზაფხულში მნიშვნელოვან საჭიროებას წარმოადგენს მოქალაქეებისთვის გადაადგილებაზე შეზღუდვის მოხსნა“ - ეკატერინე ტიკარაძე
„ჩვენ ვითვალისწინებთ, რომ განსაკუთრებით ზაფხულის პერიოდში ყველაზე მნიშვნელოვან საჭიროებას წარმოადგენს მოქალაქეებისთვის გადაადგილებაზე შეზღუდვის მოხსნა და ეკონომიკური საქმიანობისთვის ეს არის მნიშვნელოვანი გადაწყვეტილება, თუმცა, უნდა აღინიშნოს, რომ მსგავსი გადაწყვეტილებები მიიღება საბჭოს ფორმატში“- განაცხადა ჯანდაცვის მინისტრმა ეკატერინე ტიკარაძემ.
როგორც ჯანდაცვის მინისტრი აღნიშნავს, ეპიდვითარება საქართველოში საყურადღებოა. მისი თქმით, მნიშვნელოვანია საზოგადოების მობილიზაცია და რეკომენდაციების დაცვა.
„ეპიდვითარება საქართველოში საყურადღებოა, აქედან გამომდინარე, მნიშვნელოვანია, საზოგადოების მობილიზაცია და ყურადღება გამახვილდეს იმ ყველა ღონისძიების დაცვაზე, რომელიც მოწოდებულია დაავადებათა კონტროლის მხრიდან. რა თქმა უნდა, ჯანდაცვის სამინისტრო ყოველდღიურ რეჟიმში ავრცელებს ინფორმაციას, რომ საჭიროა სოციალური დისტანცია და პირბადე.
ვაგრძელებთ კვლევას, ვინაიდან არსებობს გარკვეული ეჭვი იმის თაობაზე, რომ ვირუსის დელტა შტამის გავრცელება შესაძლოა, იყოს გაცილებით მაღალი. ყველასთვის ცნობილია, რომ ინდური შტამის გავრცელება არის გაცილებით სწრაფი, ვიდრე სხვა შტამის“– განაცხადა ეკატერინე ტიკარაძემ.
მან ასევე ისაუბრა ვაქცინაციის პროცესზე და აღნიშნა, რომ მოქალაქეებს მასობრივი ვაქცინაციის დროს ექნებათ არჩევანის საშუალება თუ რომელი ვაქცინა გაიკეთონ.
„მნიშვნელოვანია ვაქცინაციის პროცესში აქტიური ჩართულობა და ასევე აღსანიშნავია, რომ რეგიონებში, სადაც დიდი აქტივობა შეინიშნებოდა, ბრიგადების დამატება მოხდა და ეს კვლავ გაგრძელდება.
ჩვენ ვმუშაობთ დამატებითი დოზების ლოჯისტიკაზე. კონკრეტულ თარიღებს სამწუხაროდ, გამომდინარე იქიდან, რომ მნიშვნელოვანია კონფიდენციალურობის დაცვა იმ მწარმოებლებისთვის, რომლებისგანაც ჩვენ ვიდებთ მაღალხარისხიან ვაქცინებს, ვერ ვასახელებთ, თუმცა უახლოეს მომავალში ჩვენ გვექნება ძალიან ფართო ასორტიმენტი, რის საფუძველზეც იგეგმება მასობრივი ვაქცინაციის დაწყება.
საუბარია როგორც „მოდერნაზე“, ასევე „ჯონსონი და ჯონსონზე“ და „ნოვოვაქსზე“. ასე რომ, ჩვენ მოქალაქეებს ექნებათ საკმაოდ მრავალფეროვანი არჩევანი, რომ მიიღონ გადაწყვეტილება და იზრუნონ როგორც საკუთარ ჯანმრთელობაზე, ასევე საზოგადოებრივი ჯანდაცვის მთავარ მონაპოვარზე, ვაქცინაციის მეთოდით პანდემიის დაძლევაზე“- განაცხადა ტიკარაძემ.
