დაკავებულს საკუთარი ჩვენება შეაჭამეს, შემდეგ კი პატიმრის გაუპატიურების ინსცენირება აყურებინეს - პროკურატურა

სასჯელაღსრულების მე-8 დაწესებულების ყოფილი დირექტორი, ალექსანდრე მუხაძე, მეტსახელად ქილერა პასუხისგებაში მისცა, საუბარია 2011 წლის მარტში
პატიმრის წამებაზე.

პროკურატურის ვერსიით, ბრალდებულმა, მეგის ქარდავასთან ერთად, კონკრეტულ პატიმარზე სასურველი ჩვენების მიღების მიზნით, ფსიქოლოგიურად და ფიზიკურად იძალადა, რის შემდეგაც პატიმარმა თვითმკვლელობა სცადა.

"საქართველოს პროკურატურამ, პატიმრის წამების ფაქტზე, მერვე დაწესებულების ყოფილი დირექტორი ალექსანდრე მუხაძე მეტსახელად ქილერა ბრალდებულად პასუხისგებაში მისცა.

გამოძიებით დადგინდა, რომ 2011 წლის მაისში, მერვე დაწესებულებაში ნარკოტიკული ნივთიერების შეძენა-შენახვის ფაქტზე დაკავებულ პირს მეგის ქარდავამ და ქილერამ პირს მოსთხოვეს, არარსებულ ტერორისტულ აქტებში მონაწილეობის აღიარება, წინააღმდეგ შემთხვევაში დაემუქრნენ გაუპატიურებით.

ასევე, საქმეში არსებული ჩვენებების თანახმად, აღნიშნულ პირს ნარკოტიკული ნივთიერება დაკავების საფუძვლის შესაქმნელად ჩაუდეს.

სასურველი ჩვენების მიცემაზე უარის თქმის შემდეგ, დაკავებული ჩაიყვანეს ციხის ე.წ კარანტინში, სადაც აყურებინეს, თუ როგორ ძალადობდნენ სექსუალურად ერთ-ერთ პატიმარზე,"- განაცხადეს პროკურატურაში.

უწყების ინფორმაციით, პატიმარი, საბოლოოდ, აიძულეს, ჩვენება მიეცა, თუმცა ეს ჩვენება არ აღმოჩნდა მათთვის საკმარისად ამომწურავი და პატიმარი აიძულეს, შეეჭამა ფურცელი, რომელზეც მისი ჩვენება იყო დაწერილი.

ამის შემდეგ, პატიმარი შეიყვანეს საკანში, სადაც ნიღბებში გამოწყობილი სხვა პატიმრების გამოყენებით, მოაწყეს გაუპატიურების ინსცენირება, რაც კამერებით გადაიღეს.

პროკურატურის ინფორმაციით, 2011 წლის მაისიდან 2012 წლის თებერვლამდე პატიმარი არაერთხელ დაკითხეს, უპირისპირებდნენ ტერაქტში თითქოს მხილებულ სხვა პირებს. ერთ-ერთი დაპირისპირების დროს ქარდავამ პატიმარს თავზე დაადო პისტოლეტი და მოახდინა დახვრეტის ინსცენირება.

საბოლოოდ, როგორც უწყებაში ამბობენ, დაზარალებული იძულებული გახდა, ხელი მოეწერა მისი მწამებლებისთვის სასურველი აღიარებისთვის, მან თვითმკვლელობაც სცადა.

პროკურატურა მასალის ვიდეომტკიცებულებასაც ავრცელებს.