ბიძინა ივანიშვილის ოლიგარქობის დამადასტურებელი რაიმე საბუთი არ არსებობს - ბექა დავითულიანი
საპარლამენტო უმრავლესობის წევრის, ბექა დავითულიანის თქმით, დეოლიგარქიზაციის კანონზე იმუშავებენ, თუმცა მისივე თქმით, აღნიშნული კანონი იქნება ზოგადი, შექმნის ჩარჩოებს, ამ ჩარჩოებში კი, არ ჩაჯდება ბიძინა ივანიშვილი, რადგან ის ოლიგარქი არ არის.
“დეოლიგარქიზაცია არის ძალიან ზოგადი ტერმინი. თუმცა, მაგალითად, უკრაინას აქვს კანონმდებლობა, რომლის მიხედვითაც ნებისმიერი ადამიანი, რომელიც დაახლოებით, 100 მილიონ დოლარზე მეტს ფლობს, აფინანსებს პოლიტიკურ ჯგუფებს ან რაიმე გზით ზეგავლენას ახდენს ამ პოლიტიკურ ჯგუფებზე ძირითადად ფინანსური წყაროებით, აქვს მედია ან მონოპოლია ბაზრის რომელიმე სეგმენტზე – ამ 4 კრიტერიუმით განისაზღვრება ვის ჰქვია ოლიგარქი და მას გარკვეული შეზღუდვები უწესდება. ამ კანონზე გვიწერია მოთხოვნებში, ვიმუშავებთ და ვის შეეხება და ვის არა, ვნახავთ. კანონში ერთი ადამიანის სახელი და გვარი არ იწერება, ეს ერთი, მეორე – ბიძინა ივანიშვილის ოლიგარქობის დამადასტურებელი რაიმე საბუთი არ არსებობს, მესამე – კანონი იქნება ზოგადი, შექმნის ჩარჩოებს და კრიტერიუმებს და ვინც ჩაჯდება ამ ჩარჩოებში მას შეეხება, სახელს და გვარს კანონთან შეხება არ აქვს, ივანიშვილი ოლიგარქი არ არის და ამიტომ ჩემი აზრით, არ ჩაჯდება, არც ბაზარის რომელიმე სეგმენტზე უჭირავს დომინანტური წილი, არც ვინმეს აფინანსებს და ა.შ,”- განაცხადა დავითულიანმა.
