„ბოდიში მას აქვს მოსახდელი, ვინც „რადიკალური ისლამიზმის“ ხსენებას მუსლიმებთან აკავშირებს“ - მდინარაძის პასუხი ნაკაიძეს
"ქართული ოცნების" აღმასრულებელი მდივანი, მამუკა მდინარაძე სოციალურ ქსელის საშუალებით, პარლამენტის წევრს, ტარიელ ნაკაიძეს პასუხობს და წერს, რომ ისლამური რადიკალიზმის დაფინანსების საფრთხეებზე საუბრისთვის ბოდიშის მოხდის მოთხოვნა, პიარული სვლაა, რაც გამოიწვევს რადიკალიზმის ყველა ფორმით წახალისებას. ამის შესახებ მამუკა მდინარაძემ საკუთარ ფეისბუქგვერდზე დაწერა.
„ისლამური რადიკალიზმის დაფინანსების საფრთხეებზე საუბრის გამო ბოდიშის მოხდის მოთხოვნა უნიჭო პიარული სვლისა და ძალიან სახიფათო პროვოკაციის
გარდა, არის რადიკალიზმის ყველა ფორმის, განსაკუთრებით რელიგიური რადიკალიზმის წახალისება.
სწორედ ამისი მცდელობა აქვს ომის პარტიის ერთ-ერთ დანაყოფს!
რაც შეეხება ჩვენს ქვეყანაში მცხოვრებ მუსლიმებს, ჩვენს დებს და ძმებს, სწორედ მათი და ჩვენი საუკუნოვანი თანაცხოვრების, ურთიერთპატივისცემის უმძიმესი შეურაცხყოფაა “რადიკალური ისლამიზმის” ხსენებისას ამ ფრაზის მუსლიმებთან დაკავშირება და მათთან ასოცირების მცდელობა!
ვინც ამას კადრულობს, მას კი ნამდვილად აქვს ბოდიში მოსახდელი!“ - წერს მდინარაძე.
ცნობისთვის, პარლამენტის წევრმა, ტარიელ ნაკაიძემ განაცხადა, რომ ფრაქცია “ქართული ოცნების“ თავმჯდომარემ, მამუკა მდინარაძემ საქართველოში მცხოვრებ მუსლიმებს შეურაცხყოფისთვის ბოდიში უნდა მოუხადოს. საუბარია მამუკა მდინარაძის განცხადებაზე, რომლითაც მან ქვეყანაში არსებულ რადიკალურ ისლამიზმის საფრთხეზე ყურადღება “უცხოური გავლენის გამჭვირვალობის შესახებ“ კანონპროექტზე საუბრისას გაამახვილა.
