„გაფრინდა უსასრულო სიყვარულში ყველაზე კეთილი, ყველაზე ღირსეული და ყველაზე დიდი არწივი“ - ომარ მხეიძის შვილიშვილი
ცნობილი მოცეკვავისა და ჩოხოსანის, ომარ მხეიძის შვილიშვილი, დეიკო მხეიძე ბაბუას იხსენებს და ამბობს, რომ ომარმა ცეკვაში მწვერვალების დაპყრობა მოახერხა.
„ბაბუა თავიდან ბოლომდე თავის ქვეყანას და ერს ეკუთვნოდა, მთელი ცხოვრება სითბოსა და სიყვარულის გაცემას მიუძღვნა, რაც ჩემი ცხოვრების გზაზეც კი ცხადად აისახება. ბევრი ისტორიის მოყოლა არ დამჭირდება, რადგან საბოლოოდ ყველაფერი ერთ დიდ თვისებას კრავს და ეს არის ღირსება. არ არსებობდა მისთვის დიდი და პატარა, წარმატებული თუ წარუმატებელი, კერძო თვითმფრინავით მოსარგებლე თუ ფეხით მოსიარულე - ყველას ერთნაირად, უდიდესი პატივისცემით ეპყრობოდა და ყოველთვის მზად იყო თავდაუზოგავად ემსახურა.
მე და ომარს ერთი რამ განსაკუთრებით გვაერთიანებს, ორივეს არაამქვეყნიურად გვიყვარს ცეკვა, განსხვავება იმაშია, რომ ომარმა მწვერვალები დაიპყრო, მიწაზე ლომი იყო, ცაში არწივი, მე კი როგორც ჩანს, გამიჭირდა ბრძოლა ამ ოცნების ასახდენად. ვაყოლინებდი ისტორიებს, ვთხოვდი ესწავლებინა სუხიშვილების ენა, ენახებინა ესა თუ ის მოძრაობა, ან უბრალოდ შეესწორებინა ჩემს მიერ შესრულებული. მიუხედავად იმისა, რომ ვსაუბრობ ბაბუაჩემზე, ყოველთვის პატივი იყო მასთან ერთად შესრულებული თითოეული ცეკვა, რაც სამწუხაროდ, მხოლოდ სამახსოვროდ დამრჩა. და ასე გაფრინდა უსასრულო სიყვარულში ყველაზე კეთილი, ყველაზე ღირსეული და ყველაზე დიდი არწივი“, - ამბობს დეიკო „ამბები ჯი“-სთან.
