კონფერენცია, რომელსაც კობახიძე უნგრეთში ესწრება, არის, თუ შეიძლება ასე ითქვას - „ქაჯი პოლიტიკოსების“ შეკრება - რომან გოცირიძე
ეს არის, თუ შეიძლება ასე ითქვას - „ქაჯი პოლიტიკოსების“ შეკრება, თუმცა მანდ ორი ქვეყნის წარმომადგენლის გარდა არცერთი იმყოფება, - ამის შესახებ „ევროოპტიმისტების“ დეპუტატმა, რომან გოცირიძემ განაცხადა, რითაც გამოეხმაურა პრემიერ-მინისტრის, ირაკლი კობახიძის ვიზიტს უნგრეთში.
რომან გოცირიძის შეფასებით, ეს არის ულტრამემარჯვენეების კონფერენცია, სადაც არცერთი სერიოზული პოლიტიკოსი და არცერთი ქვეყნის მეთაური თუ მაღალი თანამდებობის პირი არ მონაწილეობს, რომელიც ევროპულ ღირებულებებს სცემს პატივს.
“ვიცით სად იმყოფება ირაკლი კობახიძე, შარშან ღარიბაშვილი იმყოფებოდა. ეს არის ულტრამემარჯვენეების კონფერენცია, სადაც არცერთი სერიოზული პოლიტიკოსი არ მონაწილეობს და არცერთი ქვეყნის მეთაური თუ მაღალი თანამდებობის პირი, რომელიც ევროპულ ღირებულებებს სცემს პატივს. ეს არის, თუ შეიძლება ასე ითქვას - “ქაჯი პოლიტიკოსების” შეკრება, თუმცა მანდ ორი ქვეყნის წარმომადგენლის გარდა არცერთი იმყოფება.
ორბანმა კობახიძეს დიდი პოლიტიკური მოჭადრაკე უწოდა, დაავიწყდა, რომ მან შარშანდელ კონფერენციაზე ირაკლი ღარიბაშვილსაც უთხრა, რომ მაგრად თამაშობს ნარდსო - კარგი მონარდეაო. ის თუ ნარდის დიდოსტატი იყო, ეს თურმე ჭადრაკში ყოფილა სპორტის ოსტატი.
ეს, ფაქტობრივად, გაგრძელებაა “ქართული ოცნების” პუტინისტური ხაზისა, ვინაიდან საკონსტიტუციო ცვლილებები, რომელსაც პარლამენტი ვერ მიიღებს, მაგრამ მანიპულაციისთვის იყენებენ წინასაარჩევნოდ ტრადიციულ ღირებულებებთან დაკავშირებით. ის, რომ თურმე გარყვნილი ევროპა ებრძვის მართლმადიდებლობას, ქართულ იდენტობას და ა.შ ეს არის პირდაპირ ანტიდასავლური კურსის გაგრძელება შენიღბული ფორმით. ხოლო ღია ფორმით ის არის, რაც კეთდება აქ - საქართველოში და ის ინიციატივები, რასაც ახლა პარლამენტში ვხედავთ. პირველ რიგში, ამ აგენტების შესახებ “რუსული კანონის” სახით. საქართველოს ხელისუფლება ქვეყანას მიაქანებს შუა საუკუნეებისკენ”, - აღნიშნა გოცირიძემ.
ინფორმაციისთვის, საქართველოს პრემიერ-მინისტრი ირაკლი კობახიძე, უნგრეთში, კონსერვატიული პოლიტიკური მოქმედების კონფერენციაში მონაწილეობს.
