"ქმარმა აივნიდან გადმოაგდო, დედამთილი ძალადობას მალავდა" - ქართველი გოგონას სასტიკმა მკვლელობამ ესპანელები ქუჩაში გამოიყვანა - რას წერს უცხოური მედია ნათია გულბანზე?
გასულ კვირას, ესპანეთის ქალაქ ბარსელონაში, 33 წლის ქართველი ქალი ნათია გულბანი მოკლეს. პოლიციამ მალევე დააკავა მოკლულის მეუღლე 32 წლის კაცი, რომელიც ასევე საქართველოს მოქალაქე. ადგილობრივი მედიის ინფორმაციით, შემთხვევა 2 ივნისის ღამე მოხდა. ქალი საცხოვრებელი კორპუსის მეოთხე სართულიდან გადმოვარდა.
შემთხვევამდე ცოტა ხნით ადრე მეზობლებს ბინიდან ჩხუბის ხმა მოესმათ, რის შემდეგაც პოლიცია გამოიძახეს.
ესპანური მედია წერს, რომ თავდაპირველად, გამოძიება სუიციდის ვერსიას განიხილავდა, მაგრამ მომხდარის ადგილზე აღმოჩენილი მტკიცებულებებით, ასევე თვითმხილველების მონათხრობითა და პირველადი სამედიცინო ექსპერტიზის დასკვნის თანახმად, შესაძლოა, ქალი ფემიციდის მსხვერპლი გახდა.
5 ივნისს, ბარსელონას სასამართლომ გარდაცვლილის პარტნიორი კაცი მკვლელობისა და გენდერულ ძალადობაში ბრალდებით დააპატიმრა.
როგორც ადგილობრივი მედიაწერს, ქალი, რომელიც გასულ კვირას გარდაიცვალა სავარაუდო სექსისტური დანაშაულის მსხვერპლი იყო. ქალთა მიმართ ძალადობის მე-4 სასამართლომ დაკავებულს დროებითი პატიმრობა შეუფარდა, გირაოს გამოყენების გარეშე.
საქმის მიხედვით, მსხვერპლს სხეულზე ჰქონდა სისხლჩაქცევები და ჭრილობები, რაც მუდმივმა ძალადობამ გამოიწვია, თუმცა ამის შესახებ გარდაცვლის არავისთან უსაუბრია.
ადგილობრივი მედია წერს, რომ ბინაში მყოფმა გარდაცვლილის ქმარმა და დედამთილმა განაცხადეს, რომ ქალმა თავი მოიკლა. თუმცა მოწმეები, მათ შორის მეზობელი, რომელმაც მომხდარი მოპირდაპირე ბინიდან ნახა, ამტკიცებენ, რომ მამაკაცმა კამათის შემდეგ ქალი აივნიდან გადააგდო.
გარდაცვლილის გარემოცვა აცხადებს, რომ ბრალდებული კაცი ძალიან ეჭვიანი იყო. ის ქალს შეურაცხყოფას აყენებდა, აფურთხებდა, თავს ესხმოდა და დასცინოდა. პოლიციას არაერთხელ მოუწია ჩარევა კონფლიქტში, მაგრამ ქალი პარტნიორს არ უჩიოდა. ისინი წელიწად ნახევარი ცხოვრობდნენ ერთად.
გასული წლის აგვისტოში მეზობლებმა ჩხუბის გამო პოლიცია გამოიძახეს. ქალს ჰქონდა სისხლჩაქცევები და ნაკაწრები, მაგრამ მან თქვა, რომ ის სანაპიროზე ყოფნისას მიიღო. პოლიციამ კიდევ ერთხელ გარდაცვალებამდე ოთხი დღით ადრე მიაკითხა სახლში, მიზეზი მაშინაც წყვილს შორის მომხდარი ჩხუბი გახლდათ. დანაშაულის ღამეს ისინი კამათობდნენ. ქალი აივანზე გავიდა, მას მეუღლეც გაჰყვა. შემდეგ მეზობლებმა ჩხუბის და დაცემის ხმა გაიგონეს.
ამის შემდეგ სავარაუდო თავდამსხმელმა გაქცევა სცადა, მეზობლები კი მის შეჩერებას ცდილობდნენ. კაცი გაიქცა და პოლიციამ ბიძაშვილის სახლში დააკავა - წერს მედია.
თვითმხილველების ინფორმაციით, გარდაცვლილის მეუღლე ცხედარს პირველი მიუახლოვდა, მაგრამ არ დაეხმარა და არც სასწრაფოში დაურეკავს, თავი ასწია და წავიდა.
მომხდარის შემდეგ, მთელი კვირის განმავლობაში, ბინაში მცხოვრებლები გარდაცვლილის სოლიდარობის ნიშნად აქციებს მართავდნენ.
მაკო სამხარაძე კიდევ ერთი ქართველი ქალია, რომელიც ბარსელონაში ცხოვრობს, მომხდარის შემდეგ, სოციალურ ქსელში სოლიდარობის აქციიდან ფოტოები და ვიდეო გამოაქვეყნა.
