ზელენსკის მხრიდან ჩვენს არჩევნებში ჩარევა სისულელისა და ამპარტავნების უმაღლესი დონეა - სენატორი ერიკ შმიტი
ზელენსკის მხრიდან ჩვენს არჩევნებში ჩარევა, კანდიდატების აგიტაცია სულელობისა და ამპარტავნების უმაღლესი დონეა, – ამის შესახებ რესპუბლიკელი სენატორი ერიკ შმიტი „ტვიტერის“ გვერდზე წერს.
როგორც სენატორი წერს, არ სჭირდებათ, უცხო ქვეყნის ლიდერები ჩაერიონ მათ არჩევნებში.
„ეს ზელენსკის მხრიდან სულელობისა და ამპარტავნების უმაღლესი დონეა – ჩარევა ჩვენს არჩევნებში და კანდიდატების აგიტაცია. ეს ამერიკელების არჩევნებია და ჩვენ არ გვჭირდება, რომ უცხო ქვეყნის ლიდერები აშშ-ის ტერიტორიაზე ჩაერიონ არჩევნებში ან დაიჭირონ ვინმეს მხარე“, – წერს ერიკ შმიტი.
ცნობისთვის, უკრაინის პრეზიდენტი ვოლოდიმირ ზელენსკი შეერთებულ შტატებში, პენსილვანიაში ჩავიდა. „ვიწყებთ ვიზიტს შეერთებულ შტატებში. ახლა მივფრინავთ პენსილვანიაში, შემდეგ – ნიუ იორკი, ვაშინგტონი. სწორედ ამ შემოდგომაზე წყდება, რა იქნება შემდგომ ამ ომში“, – განაცხადა ზელენსკიმ პენსილვანიაში გამგზავრების წინ. ზელენსკის პენსილვანიაში ვიზიტის შემდეგ, წარმომადგენელთა პალატის სპიკერმა მაიკ ჯონსონმა უკრაინის პრეზიდენტს მოუწოდა, აშშ-ში უკრაინის ელჩი გაათავისუფლოს. როგორც მან აღნიშნა, „ვიზიტი აშკარად იყო პარტიული საკამპანიო ღონისძიება, რომელიც გამიზნული იყო დემოკრატების დასახმარებლად“.
ამასთან, „ფოქს ნიუსმა“ დაწერა, რომ აშშ-ის წარმომადგენელთა პალატის ზედამხედველობის კომიტეტი იძიებს ბაიდენი-ჰარისის ადმინისტრაციის მიერ ძალაუფლების ბოროტად გამოყენების საქმეს ვოლოდიმირ ზელენსკის პენსილვანიის ვიზიტთან დაკავშირებით. როგორც მედია წერს, კომიტეტმა უნდა დაადგინოს, გამოიყენა თუ არა ბაიდენ-ჰარისის ადმინისტრაციამ გადასახადის გადამხდელთა მიერ დაფინანსებული რესურსები ზელენსკის პენსილვანიის შტატში ვიზიტისთვის.
