მოვუწოდებ მთავრობას, მოსახლეობას განუმარტოს, როგორ ხდება კოვიდინფიცირებულების ბინაზე მკურნალობა - ნინო ლომჯარია

სახალხო დამცველი ნინო ლომჯარია სოციალურ ქსელში განცხადებას ავრცელებს და მთვარობას მოუწოდებს, საზოგადოებისთვის ბინაზე მკურნალობის პროტოკოლი გააცნონ.
როგორც ლომჯარია აცხადებს, კოვიდინფიცირებულებისთვის, რომლებიც ბინაზე მკურნალობენ, დროულად არ ხდება სამედიცინო დახმარების გაწევა:

„აშკარაა, მოსახლეობისთვის არ არის ნათელი ინფიცირების შემთხვევაში ბინაზე მკურნალობის წესები. არაერთი ინფიცირებული პირი აცხადებს, რომ დღეების განმავლობაში ვერ იღებს სამედიცინო დახმარებას და კონსულტაციას.

შექმნილი რთული ვითარების გათვალისწინებით, საქართველოს სახალხო დამცველი მოუწოდებს საქართველოს მთავრობას და შესაბამის უწყებებს, უმოკლეს ვადებში:

მოსახლეობას განუმარტონ კოვიდით დაინფიცირების დროს როგორ ხდება ბინაზე მკურნალობა. უფრო ზუსტად, ვის და რა ვადაში ევალება დაუკავშირდეს პაციენტს; როგორი ფორმით და სიხშირით განხორციელდება პაციენტებზე ზედამხედველობა შესაბამისი სამედიცინო პერსონალის მიერ; რომელი კონკრეტული უწყებაა ამ პროცესზე ზედამხედველი, რათა პაციენტებმა შეძლონ არსებულ პრობლემებზე მისთვის ინფორმაციის მიწოდება და დროული დახმარების მიღება.

გასცენ პირველადი სამედიცინო რჩევები, რითიც უნდა იხელმძღვანელოს ინფიცირებულმა თვითმკურნალობის დროს მანამ, სანამ ექიმი დაუკავშირდება“ - წერს ნინო ლომჯარია ფეისბუკის საკუთარ გვერდზე.


წყარო:newposts.ge