„ევროვიზია 2021“ კოვიდრეგულაციების დაცვით ჩატარდება
სიმღერის კონკურსი „ევროვიზია“ წელს სავარაუდოდ ცარიელ დარბაზში ჩატარდება. ამის შესახებ კონკურსის ორგანიზატორებმა განაცხადეს.
მათივე თქმით, კონკურსის მონაწილეებსა და პერსონალს სოციალური დისტანციის დაცვა და კოვიდ-ტესტების ჩატარება მოუწევთ. იმ მონაწილეებს კი, რომლებიც ნიდერლანდებში ჩასვლას ვერ შეძლებენ, კონკურსზე ცოცხალი ჩანაწერის წარდგენის უფლება ექნებათ.
ეპიდემიოლოგიური სიტუაციის გათვალისწინებთ, კონკურსის ფინალის ფორმატზე მუშაობა ჯერ კიდევ მიმდინარეობს და საბოლოო გადაწყვეტილება უახლოეს ხანებში გამოცხადდება.
„ევროვიზიის“ ფინალი როტერდამში 22 მაისს გაიმართება. „ევროვიზია“ 2020 პანდემიის გამო გაუქმდა.
