როგორც ინფიცირებულთა, ისე სიკვდილიანობის რაოდენობით, სამწუხაროდ, პირველ სამეულში ვართ - ამირან გამყრელიძე
როგორც ინფიცირებულთა რაოდენობით, ისე სიკვდილიანობის რიცხვით, სამწუხაროდ, ვართ პირველ სამეულში, - ამის შესახებ დაავადებათა კონტროლის ეროვნული ცენტრის გენერალურმა დირექტორმა, ამირან გამყრელიძემ განაცხადა.
"საკმაოდ წითელ ზონაში ვართ და საკმაოდ მაღლა ვართ. საერთო მონაცემებს თუ ავიღებთ, რამდენია ინფიცირებული 100 ათას მოსახლეზე, 1 მილიონ მოსახლეზე, ამ წელიწადნახევრის განმავლობაში, ამით ვართ სადღაც პირველ ოცეულში. მაგრამ, ბოლო 1 ან ბოლო 2 კვირის მონაცემებს თუ აიღებთ 100 ათას მოსახლეზე, როგორც ინფიცირებულთა რაოდენობით, ისე სიკვდილიანობის რიცხვით, სამწუხაროდ, ვართ პირველ სამეულში,"- განაცხადა ამირან გამყრელიძემ.
ბოლო 24 საათში, საქართველოში კორონავირუსის 3803 შემთხვევა დადასტურდა, 5332 პაციენტი გამოჯანმრთელდა, ხოლო 48 ადამიანი დარდაიცვალა.
პანდემიის დაწყებიდან დღემდე, მთლიანობაში, საქართველოში კორონავირუსის 514744 შემთხვევა არის გამოვლენილი და 6771 ადამიანი გარდაიცვალა.
