„ლავასოღლი, პირდაპირ გეუბნები, ყოფას გიტირებ!“ - ნიკა მელიას სკანდალური მიმართვა ე.წ. კანონიერ ქურდს
„ნაციონალური მოძრაობის“ თავმჯდომარე ნიკა მელია ე.წ. კანონიერ ქურდებს შეურიგებელ ბრძოლას უცხადებს. როგორც მელიამ ბათუმში გამართულ აქციაზე განაცხადა, ის ყველაფერს იზამს იმისთვის, რომ ამ ქვეყანაში კრიმინალური ავტორიტეტები აღარ იყვნენ.
„ვემზადებით ლავასოღლების და კანონიერი ქურდების დასამარცხებლად. არ ვიცხოვრებთ იმ ქვეყანაში, სადაც კანონიერი ქურდი და კრიმინალი იქნება დომინანტი. არ დაბრუნდება 90-იანი წლები. ყველა კანონიერ ქურდს სახეში სილა მოხვდება ქართველი ერისგან და ამას მე პირადად სიამოვნებით გავაკეთებ.
განა პოლიციელებმაც არ იციან, რომ კანონიერ ქურდებს ბიძინა ივანიშვილმა ძალაუფლება მისცა და თან ათანამშრომლებს სუს-თან? როდესაც პოლიციელი ხარ და ხედავ, რომ „ქართულ ოცნებას“ პარტიული აქტივი მოჰყავს, ძალადობენ და ვერაფერს აკეთებენ. პოლიციელები კანონიერ ქურდებს ტყვეობაში ჰყავთ აყვანილი. კრიმინალი არის დასამარცხებელი, რომელიც უკვე ხელისუფლების სახით არის წარმოდგენილი, მათ შორის ბათუმში - ვიღაც ლავასოღლი. რატომ უნდა იცოდნენ ვიღაც კრიმინალის, მოძალადის, ჩემი და თქვენი შვილების მომავლის მომპარავის სახელი და გვარი უმცროსი თაობის წარმომადგენლებმა? ვერცერთი კანონიერი ქურდი ვერ გაიხარებს. ლავასოღლი, ყოფას გიტირებ, პირდაპირ გეუბნები, ყოფას გიტირებ“, - აღნიშნა მელიამ.
