11 თვეში ქართულმა ბანკებმა რეკორდული - 2 მილიარდ ლარამდე მოგება მიიღეს

2021 წლის 11 თვეში ქართული ბანკების წმინდა მოგება რეკორდულად გაიზარდა. მთლიანობაში 14-მა კომერციულმა ბანკმა 1.97 მილიარდი ლარის მოგება გამოიმუშავა, რაც არამხოლოდ კრიზისულ 2020 წელთან, არამედ 2019 და ნებისმიერ წინა წელთან შედარებითაც მეტია.

მთლიანობაში 2021 წლის 11 თვეში ბანკებმა ჯამური შემოსავლის სახით 5.4 მილიარდი ლარი მიიღეს; შედარებისთვის ეს თანხა წინა წლის ანალოგიურ პერიოდთან მიმართებით 23%-ით მეტია. გაზრდილია როგორც სესხებიდან მიღებული შემოსავლები, ასევე სხვა ფინანსური ოპერაციებიდან და საკომისიოებიდან მიღებული შემოსავლები, თუმცა სექტორისთვის შემოსავლის მთავარ წყაროდ მაინც ფიზიკური პირების სესხები რჩება.

უფრო დეტალურად, ეს მაჩვენებლები ასე ნაწილება:

• ბანკების საპროცენტო შემოსავლები ფიზიკური პირების სესხებიდან - 2.24 მილიარდი ლარი, მატება წინა წელთან 21%;
• ბანკების საპროცენტო შემოსავლები იურიდიული პირების სესხებიდან - 1.51 მილიარდი ლარი, მატება 18%.

საკომისიოებიდან, ჯარიმებიდან და სხვა ოპერაციებიდან მიღებული შემოსავლები ასე ნაწილდება:

• წმინდა მოგება მომხმარებლებისთვის ვალუტის კონვერტაციის ოპერაციებიდან - 263.4 მილიონი ლარი, მატება წინა წელთან 930%;
• საკომისიოები გაწეული მომსახურებისთვის - 417 მილიონი ლარი, მატება წინა წელთან 41%;
• ჯარიმები - 66 მილიონი ლარი, მატება წინა წელთან 44%.

რაც შეეხება ბანკების ხარჯებს – ყველაზე დიდი ხარჯი მოქალაქეებისა და ბიზნესების დეპოზიტებზე დარიცხული საპროცენტო სარგებელი იყო, რომლის მოცულობამაც 1.17 მილიარდი ლარი შეადგინა. ამასთან, ბანკებმა თავიანთი სესხების მომსახურებაზე (უცხოური და ადგილობრივი ფინანსური ორგანიზაციების მიმართ) 697 მილიონი ლარი დახარჯეს.

ქვეყანაში მოქმედმა ბანკებმა თავიანთ თანამშრომლებზე ხელფასების სახით 711 მილიონი ლარი გასცეს. ბანკების ადმინისტრაციის და აპარატის შენახვის ხარჯები წელს 15%-ით არის გაზრდილი.

მთლიანობაში საბანკო სისტემამ 2.2 მილიარდი ლარის მოგება დააგენერირა, ხოლო მოგების გადასახადის სახით 240 მილიონი ლარი გადაიხადა. შედეგად, ბანკების მესაკუთრეებსა და აქციონერებს 1.97 მილიარდი ლარის წმინდა მოგება დარჩათ.

კონკრეტული თვეების განმავლობაში საბანკო სექტორის მოგების მაჩვენებელი ასეთი იყო:

იანვარი – 113.4 მილიონი ლარი;
თებერვალი – 132 მილიონი ლარი;
მარტი – 166.3 მილიონი ლარი;
აპრილი – 173 მილიონი ლარი;
მაისი - 204 მილიონი ლარი;
ივნისი - 294.6 მილიონი ლარი;
ივლისი - 178 მილიონი ლარი;
აგვისტო - 233.1 მილიონი ლარი;
სექტემბერი - 171.2 მილიონი ლარი;
ოქტომბერი - 117.5 მილიონი ლარი;
ნოემბერი - 209 მილიონი ლარი.

ამჟამად საბანკო სექტორის აქტივების ზომა 59.6 მილიარდ ლარს შეადგენს.
წყარო: bm.ge