"აგარის შაქრის“ ქარხანა 1-ელ აპრილს ისევ ამუშავდება
შაქრის მწარმოებელი ადგილობრივი კომპანია „აგარის შაქარი“ 1 აპრილიდან ამუშავდება. აღნიშნული ინფორმაცია BM.GE-ის სოფლის მეურნეობის სამინისტროში დაუდასტურეს.
ინფორმაციას კომპანია „აგარის შაქრის“ დამფუძნებლის წარმომადგენელი ნიკოლოზ ნათბილაძეც ადასტურებს.
აღსანიშნია, რომ დღეს გარემოს დაცვისა და სოფლის მეურნეობის მინისტრი ოთარ შამუგია მსხვილი სავაჭრო ქსელების და სურსათისა და პირველადი მოხმარების პროდუქციის საქართველოში იმპორტის განმახორციელებელი კომპანიების წარმომადგენლებს შეხვდა, რომელსაც ნიკოლოზ ნათბილაძეც ესწრებოდა. როგორც მინისტრმა შეხვედრის დასრულების შემდეგ განაცხადა, პროდუქტების მარაგების მხრივ არანაირი დეფიციტი არ არსებობს.
BM.GE-ს ინფორმაციით, "აგარის შაქრის" ქარხანა მორიგ კონსერვაციის რეჟიმზე გასული წლის დეკემბერში გადავიდა. როგორც მაშინ კომპანიის დამფუძნებლის წარმომადგენელმა BM.GE-ის განუცხადა, ქარხნის ამოქმედება 2022 წლის 1 მარტიდან იგეგმებოდა.
საქმე ის არის, რომ რამდენიმე წელია აგარის შაქრის ქარხანა წელიწადში რამდენიმე თვის განმავლობაში ამუშავებას სახელმწიფოს ხელშეწყობით ახერხებს, თუმცა კომპანიაში მხარდამჭერ მექანიზმებზე არ საუბრობენ. 2021 წელსაც ქარხანა 1 აპრილს ამოქმედდა.
წყარო
