2023 წელს საქართველოში საწვავის ყველაზე დიდი მოცულობის იმპორტი რუსეთიდან განხორციელდა

საქართველოს კონკურენციისა და მომხმარებლის დაცვის სააგენტო საავტომობილო საწვავის ბაზრის 2023 წლის მონიტორინგის შუალედურ ანგარიშს აქვეყნებს.

ანგარიშის მიხედვით, ქვეყანაში 54 ეკონომიკური აგენტის მიერ 1 541 612 ათასი ლიტრი ბენზინისა და დიზელის იმპორტი განხორციელდა.

საწვავის ყველაზე დიდი მოცულობის იმპორტი განხორციელდა რუსეთის ფედერაციიდან – 62.5%, რომელსაც მოჰყვება რუმინეთი – 15.3% და ბულგარეთი – 9.4%.

2023 წელს საცალო ბაზარზე 1194 ავტოგასამართი სადგურის ოპერირებას 378 კომპანია ახორციელებდა. ბაზრის კონცენტრაციის – ჰერფინდალ ჰირშმანის მაჩვენებელმა შეადგინა 1107 ერთეული, რაც დაბალკონცენტრირებული ბაზრის მაჩვენებელია. ბაზრის საცალო დონეზე სამი ყველაზე მსხვილი კომპანიის წილი შეადგენს 50.8%-ს, ხუთი კომპანიის – 66.2%-ს.

საწვავის   საცალო   ბაზარზე 2023 წლის პირველი ნახევარი ფასების შემცირების ტენდენციით ხასიათდებოდა, ხოლო მეორე ნახევარი ფასების ზრდის – მსგავსად  საქართველოსთვის საწვავის მომწოდებელ ძირითად ევროპულ ქვეყნებში (რუმინეთი, ბულგარეთი). კერძოდ, წლის პირველ ნახევარში – რეგულარის მარკის საწვავის შემთხვევაში ფასი 1 ლიტრზე  50-70 თეთრით შემცირდა, პრემიუმის შემთხვევაში 50-60 თეთრით, ხოლო დიზელის შემთხვევაში აგვისტოს ჩათვლით ფასი შემცირდა 75-90 თეთრით. 2023 წლის მეორე ნახევარში მაქსიმალური ფასი საქართველოში ოქტომბერში დაფიქსირდა, ხოლო რუმინეთსა და ბულგარეთში სექტემბერში. მაქსიმალური ნიშნულის შემდეგ საქართველოში ფასი  შემცირდა, საშუალოდ, 1 ლიტრზე 15 თეთრით.