თუ ბაიდენი „გამარჯვების გეგმას“ მხარს არ დაუჭერს, ეს ნიშნავს, რომ მას ომის დასრულება არ სურს - ზელენსკი
უკრაინის პრეზიდენტი ვოლოდიმირ ზელენსკი აცხადებს, რომ მომავალ კვირას აშშ-ის პრეზიდენტ ჯო ბაიდენს უკრაინის „გამარჯვების გეგმას“ წარუდგენს და იმედი აქვს, რომ ბაიდენი მას დაამტკიცებს. თუმცა, თუ აშშ-ის პრეზიდენტი ამ გეგმას უარყოფს, ეს ნიშნავს, რომ მას ომის დასრულება არ სურს. უკრაინას კი მოუწევს, „გეგმა B-ის“ მიხედვით იმოქმედოს. ამის შესახებ ზელენსკიმ The New Yorker-თან ინტერვიუში განაცხადა.
„უკრაინა უკვე მრავალი წელია, გეგმა B-ის მიხედვით ცხოვრობს. გეგმა A სრულმასშტაბიანი ომის დაწყებამდე იყო შემოთავაზებული, როდესაც ორ რამეს ვითხოვდით: პრევენციულ სანქციებს და უკრაინის პრევენციულ გაძლიერებას სხვადასხვა ტიპის იარაღით”, - აღნიშნა ზელენსკიმ.
მისი თქმით, ის ახლა გვთავაზობს „ახალ გეგმა A-ს“ - უკრაინის გაძლიერების გეგმას.
„ეს არ არის ფანტასტიკა, ან სამეცნიერო ფანტასტიკა და, რაც მთავარია, წარმატების მისაღწევად ის რუსეთის თანამშრომლობას არ მოითხოვს. ამ გეგმაში საუბარია იმაზე, თუ რისი გაკეთება შეუძლიათ ჩვენს პარტნიორებს რუსეთის მონაწილეობის გარეშე. თუ დიპლომატია ორივე მხარის სურვილია, მაშინ, ვიდრე დიპლომატია ეფექტური გახდება, გეგმის განხორციელება მხოლოდ ჩვენზე და ჩვენს პარტნიორებზეა დამოკიდებული“, - განაცხადა სახელმწიფოს მეთაურმა.
ზელენსკიმ ხაზგასმით აღნიშნა, რომ გეგმა, პირველ რიგში, ბაიდენის მხარდაჭერის გათვალისწინებით შემუშავდა.
„თუ მას არ სურს, გეგმას მხარი დაუჭიროს, ამას ვერ ვაიძულებ. თუ ის უარს იტყვის, მაშინ ჩვენ უნდა გავაგრძელოთ ცხოვრება B გეგმის მიხედვით და ეს სამწუხაროა. ეს საშინელი აზრია. ეს ნიშნავს, რომ ბაიდენს არ სურს ომის დასრულება ისე, რომ რუსეთმა გამარჯვება ვერ შეძლოს. საბოლოოდ, მივიღებთ ძალიან ხანგრძლივ ომს - შეუძლებელ, დამქანცველ სიტუაციას, რომელშიც უამრავი ადამიანი დაიღუპება“, - განაცხადა ზელენსკიმ.
ამასთან, მან ხაზგასმით აღნიშნა, რომ ასეთ ვითარებაში ბაიდენს არაფერში დაადანაშაულებს, რადგან უკრაინის მხარდაჭერაში მის უზარმაზარ დამსახურებას აღიარებს.
„ჩვენ ვაღიარებთ ბაიდენის უზარმაზარ დამსახურებას ამ მხრივ. მისი ეს ნაბიჯი უკვე ისტორიულ გამარჯვებად იქცა“, - აღნიშნა ზელენსკიმ.
