რატომ აყენებენ აშშ-ში ასაწევი მექანიზმის მქონე ფანჯრებს, ჩვენთან კი გამოსაღებს?

ფანჯარა სახლის მნიშვნელოვანი ნაწილია, რომელიც ქვეყნის კლიმატურ პირობებს, არქიტექტურულ ტრადიციებსა და კულტურულ ჩვევებს ერგება. საქართველოში სახლებს განიერი ფანჯრები აქვთ, რომლებიც გარეთ იხსნება, აშშ-ში კი ფანჯრების უმეტესობა ზემოთ იწევა. რატომ დამკვიდრდა ეს  წესი?

პირველი სლაიდური ტიპის ფანჯარა XVII საუკუნის დასაწყისში,  ინგლისში გამოიგონეს. მიზეზი ის იყო, რომ ძლიერი ქარი ტრადიციულ ფანჯრებს ხშირად ხურავდა და მინებს ამტვრევდა. პრობლემის გადასაჭრელად, დურგლებმა შექმნეს მოძრავი სარტყლების მექანიზმი, რომლის დახმარებითაც მინა ქარის ნაკადებისგან არ ზიანდება და შეიძლება დიდი ძალისხმევის გარეშე დაიხუროს.

თავდაპირველად, ეს მოდელი პოპულარული გახდა დიდ ბრიტანეთში, მოგვიანებით კი ინგლისელმა კოლონისტებმა ის ჩრდილოეთ ამერიკაში შეიტანეს, სადაც კიდევ უფრო მეტად გავრცელდა.

აშშ-ში დასახლებული ბრიტანელები ახალ პირობებს შეეჯახნენ. ამერიკაში სახლები უმეტესად ფანჯრის ვიწრო ღიობებით შენდებოდა, ხოლო კლიმატი ზოგ რეგიონში კარგ ვენტილაციას მოითხოვდა. ამ პირობებში სლაიდერ-ფანჯრები იდეალური გამოსავალი აღმოჩნდა:

ეკონომიურია სივრცის მხრივ – გასახსნელი ფანჯრები დამატებით ადგილს საჭიროებს, სლაიდერები კი ზემოთ იწევა და ავეჯს ან ფანჯრის რაფაზე მოთავსებულ მცენარეებს ხელს არ უშლის.

მარტივად მოსახმარია – სასურველ სიმაღლეზე მარტივად ფიქსირდება, რაც ჰაერის ნაკადის რეგულირების საშუალებას იძლევა.

გამარტივებული სქემა – თანამედროვე ფანჯრების რთული მექანიზმებისგან განსხვავებით, „ასაწევ ფანჯრებს“ ნაკლები მოძრავი ნაწილი აქვს, რაც მას გამძლესა და საიმედოს ხდის.

დროთა განმავლობაში ვერტიკალური ფანჯრები ამერიკულ არქიტექტურაში დამკვიდრდა და მისი განუყოფელი ნაწილი გახდა. დღეს ასეთი ფანჯრები არამარტო საცხოვრებელ სახლებში, არამედ ოფისებში, სკოლებში, სასტუმროებში და საზოგადოებრივ ტრანსპორტშიც გვხვდება.

რატომ ვერ დამკვიდრდა სლაიდერ-ფანჯრები საქართველოში?

მიუხედავად იმისა, რომ სლაიდერები მსოფლიოს ბევრ კუთხეში პოპულარულია, ისინი საქართველოში იშვიათად გვხვდება. ამას რამდენიმე მიზეზი აქვს:

საქართველოში „ასაწევი ფანჯრების“ დამზადება არ ხდება, რადგან ადგილობრივ ბაზარზე სახელურისა და ფანჯრის ჩარჩოსთვის საჭირო ამწევი მექანიზმები არ იწარმოება. ნაწილების სხვა ქვეყნებიდან იმპორტი კი დიდ ხარჯებთან არის დაკავშირებული.

ხარჯების გარდა, გასათვალისწინებელია ისიც, რომ მაღალსართულიან სახლებში ფანჯრების გარედან გარეცხვა აუცილებელია. გახსნადი ფანჯრები ამის საშუალებას იძლევა, მაგრამ სლაიდერ-ფანჯრები ბოლომდე არ იღება, რაც წმენდას ართულებს.