169 700 ადამიანს სესხის პროცენტი გაუძვირდა
ეროვნულმა ბანკმა რეფინანსირების განაკვეთი 10,5%-მდე გაზარდა, რის შედეგადაც 169,7 ათას ადამიანს სესხის პროცენტი 0,5 პროცენტული პუნქტით გაუძვირდა.
სებ-ის ინფორმაციით, 1-ლი ნოემბრის მდგომარეობით ცვლადი საპროცენტო განაკვეთით სწორედ 169,7 ათასი სასესხო ხელშეკრულებაა გაფორმებული. ასეთი სესხების საერთო მოცულობა 8,39 მილიარდი ლარია.
რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს. როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ — ამ დროს მსესხებლებს აღნიშნულ განაკვეთზე მიბმული კრედიტები უძვირდებათ. შესაბამისად, ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს.
რეფინანსირების განაკვეთის ზრდით ეროვნული ბანკი ქვეყანაში არსებულ მაღალ ინფლაციას პასუხობს. როგორც ცნობილია, ნოემბერში ფასების საერთო დონის წლიური ზრდა 12,5% იყო.
ეროვნული ბანკის ანგარიშში საუბარია იმაზე, რომ საგარეო ფაქტორების წვლილი ნოემბრის წლიურ ინფლაციაში დაახლოებით 9 პროცენტულ პუნქტს უტოლდება. სებ-ი ინფლაციის მაჩვენებლის დარეგულირებას 2022 წლის გაზაფხულიდან ელოდება.
წყარო: on.ge
